कोलकाता - भारत आणि बांगलादेश संघात कोलकाताच्या ईडन गार्डन्स मैदानावर ऐतिहासिक दिवस-रात्र कसोटी सामना रंगला आहे. बांगलादेशच्या पंतप्रधान शेख हसीना यांनीही या सामन्याला हजेरी लावली आहे. शेख हसीना यांनी मैदानातील घंटा वाजवून ऐतिहासिक सामन्याला सुरुवात केली.
भारतामध्ये प्रथमच होणाऱ्या या दिवस-रात्र कसोटी सामन्याचा शेख हसिना यांनी आनंद लुटला. त्यांच्यासोबत पश्चिम बंगालच्या मुख्यमंत्री ममता बॅनर्जी याही उपस्थित होत्या. दरम्यान, सौरव गांगुलीच्या बोलवण्यावरुन मी हा सामना पाहण्यासाठी आले असल्याचे शेख हसीना यांनी सांगितलं.
याविषयी बोलताना शेख हसीना यांनी सांगितलं की, 'सौरव गांगुलीच्या निमंत्रणावरुन मी कोलकातामध्ये आले. मला भारत-बांगलादेश संघातील पहिल्या दिवस-रात्र कसोटी सामन्याचे साक्षीदार होता आले. भारतीय प्रेक्षकांनी मला भरभरुन प्रेम दिलं, यामुळे मी त्यांचे आभार मानते.'