मुंबई -'टायगर जिंदा है' चित्रपटाच्या दोन वर्षानंतर सलमान खान आणि कॅटरिना कैफची जादु पुन्हा एकदा चित्रपटगृहात पाहायला मिळत आहे. दिग्दर्शक अली अब्बास जफरसोबत तिसऱ्यांदा एकत्र येत या दोघांचीही जोडी पुन्हा एकदा हिट ठरली आहे. 'ईद'च्या मुहूर्तावर प्रदर्शित झालेल्या 'भारत' चित्रपटाने पहिल्या दिवसापासूनच प्रेक्षकांना चित्रपटगृहात खेचण्यास सुरुवात केली आहे. पहिल्याच दिवशी सर्वाधिक कमाई करुन यावर्षीचा बिगेस्ट ओपनर ठरलेल्या या चित्रपटाने चारच दिवसात शंभर कोटीचा आकडा पार केला आहे.
'भारत'ने आत्तापर्यंत १३० कोटीचा गल्ला जमवला आहे. या चित्रपटाद्वारे सलमान खान हा सर्वाधिक शंभर कोटी गल्ला जमवणाऱ्या चित्रपटाच्या यादीत अव्वल ठरला आहे. त्याच्या आत्तापर्यंत १४ चित्रपटांनी शंभर कोटीची कमाई केली आहे. त्यापैकी ३ चित्रपट हे ३०० कोटी तर, २ चित्रपट हे २०० कोटींचा गल्ला जमवणारे आहेत.