मुंबई -बॉलिवूड अभिनेत्री कंगना रनौत तिच्या परखड विधानांसाठी प्रसिद्ध आहे. १० दिवसांच्या धार्मिक प्रवासानंतर ती पुन्हा परतली आहे. तिच्या वाढदिवसानिमित्त तिने १० दिवस मौनव्रत धारण केले होते. त्यासाठी ती कोईम्बतूर येथे गेली होती आणि परतताच तिने पुन्हा एकदा माध्यमांचे लक्ष केंद्रीत करण्यास सुरुवात केली आहे.
कंगना रनौत नेहमी कोणत्या ना कोणत्या कारणांमुळे माध्यमांच्या मथळ्यांमध्ये झळकत असते. यावेळी तर तिने चक्क राष्ट्रीय पुरस्कार मिळण्याबाबतच्या विश्वासार्हतेवरच प्रश्नचिन्ह उमटविला आहे.
एका माध्यमाने दिलेल्या वृत्तानुसार, 'मणिकर्णिका' चित्रपटाला राष्ट्रीय पुरस्कार मिळेल की नाही, याबाबत कंगनाला तिची प्रतिक्रिया विचारण्यात आली होती. यावेळी ती म्हणाली, की 'मला असे वाटते, काही गोष्टी आहेत ज्याचा आपण आदर केला नाही, तर ते त्या संस्थेचा अपमान केल्यासारखा असेल. जर मी किंवा माझा चित्रपट 'मणिकर्णिका' हा राष्ट्रीय पुरस्कारासाठी योग्य ठरला नाही, तर त्यांच्या विश्वासार्हतेवर प्रश्नचिन्ह निर्माण होईल. मात्र, जर मी इतर कामांमध्ये चांगली ठरली तर, ते चांगलेच होईल'.