‘द कपिल शर्मा शो’ जेव्हापासून सुरु झालाय तेव्हापासून तो प्रेक्षकांच्या गळ्यातील ताईत बनला आहे. विनोदी अभिनेता आणि स्टॅन्ड अप कॉमेडियन कपिल शर्माचा निर्भेळ विनोद प्रेक्षकांना तर आवडतोच परंतु मोठमोठे बॉलिवूड स्टार्स सुद्धा या शोचे आणि अर्थातच कपिल शर्मा चे फॅन्स आहेत. शाहरुख खान, सलमान खान जो या शोचा निर्माता देखील आहे, आमिर खान, रणवीर सिंग, रणबीर कपूर, अनुष्का शर्मा, आलिया भट, दीपिका पदुकोन, अक्षय कुमार, ऐश्वर्या राय बच्चन आणि इतर असंख्य बॉलिवूडकर या शोचे चाहते आहेत. त्यांच्यासोबत त्यांच्या फॅमिलीजसुद्धा हा शो आवर्जून बघतात. तसेच ‘द कपिल शर्मा शो’चे निमंत्रण मिळणे ही एक प्रतिष्ठेची बाब बनली आहे आणि सर्वच छोटे-मोठे कलाकार या शोमध्ये येण्यासाठी उत्सुक असतात, अगदी एका पायावर तयार असतात.
सहाएक महिन्यांपूर्वी ‘द कपिल शर्मा शो’ ने ब्रेक घेतला होता. कोरोनाच्या दुसऱ्या लाटेचा प्रहार होण्यापूर्वी कपिल शर्माने आपल्या कुटुंबियांसमवेत वेळ घालविण्यासाठी हा शो थोड्या काळाकरता थांबविला होता. एकाअर्थी ते त्याच्या पथ्यावरच पडले कारण एप्रिलपासून महाराष्ट्रात पुन्हा लॉकडाऊन लागला आणि सर्व प्रकारच्या शूटिंग्सवर बंदी घालण्यात आली होती. आता कोरोनाची दुसरी लाट ओसरत असून अनेक चित्रपट, मालिकांचे चित्रीकरण जोमाने सुरु झाले आहे. ‘द कपिल शर्मा शो’ ने काही महिन्यांपूर्वी विश्रांती घेतली होती आणि आता तो एका नवीन सीझनसह प्रेक्षकांसमोर येण्यासाठी सज्ज आहे. विनोदी कलाकार आणि अभिनेता कपिल शर्मा आपली ‘विनोदाची-बुलेट-ट्रेन’ ‘टीकेएसएस’ (TKSS ) घेऊन परत येत आहे.