धडाकेबाज अॅक्शन असलेला मराठी चित्रपट, 'ये रे ये रे पैसा २' लवकरच प्रेक्षकांच्या भेटीला

महागड्या गाड्या, हेलिकॉप्टरचा तामजाम यासोबतच अॅक्शन सिक्वेन्स, दमदार स्टारकास्ट हे सर्वकाही 'येरे येरे पैसा २' मध्ये पाहायला मिळणार आहे. या चित्रपटाची संपूर्ण टीम अलिकडेच नाशिक येथे आली होती.

नाशिक - 'ये रे ये रे पैसा' चित्रपटाचा पहिला भाग हिट ठरल्यानतंर आता या चित्रपटाचा दुसरा भाग देखील प्रदर्शनाच्या वाटेवर आहे. मराठीतील हा बिग बजेट चित्रपट मानला जातोय. या चित्रपटाचे बहुतांश शूटिंग इग्लंड येथे झाले आहे. महागड्या गाड्या, हेलिकॉप्टरचा तामजाम यासोबतच अॅक्शन सिक्वेन्स, दमदार स्टारकास्ट हे सर्वकाही 'ये रे ये रे पैसा २' मध्ये पाहायला मिळणार आहे. या चित्रपटाची संपूर्ण टीम अलिकडेच नाशिक येथे आली होती. यादरम्यान चित्रपटातील कलाकारांशी आमच्या 'ईटीव्ही भारत'च्या प्रतिनीधीने संवाद साधला.

'ये रे ये रे पैसा २' ची निर्मिती अमेय खोपकर यांनी केली आहे. तर, हेमंत ढोके यांनी या चित्रपटाची दिग्दर्शनाची धुरा सांभाळली आहे. कर्ज बुडवून पळून गेलेला उद्योजक आणि त्याचा शोध घेणाऱ्या आण्णा आणि त्यांचे अतरंगी साथीदार यांची ही गोष्ट आहे.

या चित्रपटात अभिनेते संजय नार्वेकर, प्रियदर्शन जाधव, अनिकेत विश्वासराव, प्रसाद ओक, पुष्कर श्रोत्री, आनंद इंगळे, मृणाल कुलकर्णी, मृण्मयी गोडबोले, विशाखा सुभेदार, स्मिता गोंदकर, अशी दमदार स्टारकास्ट आहे.

संजय मेमाणे यांनी या चित्रपटाची कथा लिहिली असून, फैजल इमरान यांनी संकलन केलंय. ट्राय आरिफ यांनी पार्श्वसंगीत दिले आहे. सुनील नवले यांनी रंगभूषा केली असून, सचिन लोवलेकर यांनी वेशभूषा, राहुल संजीव यांनी नृत्यदिग्दर्शन केले आहे. यामध्ये अवधूत गुप्ते, मुग्धा कऱ्हाडे, शाल्मली खोलगडे आणि मिक्का सिंग यांच्या आवाजातील गाणी देखील पाहायला मिळणार आहेत. ९ ऑगस्ट रोजी हा चित्रपट प्रदर्शित होणार आहे.