मुंबई - सलमान खानच्या बहुचर्चित 'दबंग ३' चित्रपटाचे शूटिंग पूर्ण झाले आहे. 'चुलबुल पांडे'च्या रुपात सलमान खान पुन्हा एकदा प्रेक्षकांच्या भेटीला येणार आहे. या चित्रपटाचे आत्तापर्यंत बरेचसे अपडेट्स सलमानने सोशल मीडियावर शेअर केले आहेत. शूटिंग पूर्ण झाल्यानंतरही त्याने संपूर्ण टीमसोबतचा एक व्हिडिओ शेअर केला आहे. विशेष म्हणजे सुप्रसिद्ध अभिनेते विनोद खन्ना यांच्या बर्थ अनिव्हर्सरीच्या दिवशीच शूटिंग पूर्ण झाल्याने सलमानने या व्हिडिओतून त्यांना आदरांजली वाहिली आहे.
सलमान खान आणि विनोद खन्ना यांनी 'दबंग', 'दबंग २' आणि वॉन्टेड यांसारख्या चित्रपटात भूमिका साकारली होती. 'दबंग' चित्रपटात विनोद खन्ना हे सलमानच्या वडिलांच्या भूमिकेत दिसले होते. आता 'दबंग ३' चित्रपटात विनोद यांचे भाऊ प्रमोद खन्ना हे त्यांच्या जागेवर दिसणार आहेत.