Imran Khan Bail : इम्रान खान यांना मोठा दिलासा, सर्व प्रकरणांमध्ये जामीन मंजूर

पाकिस्तानचे माजी पंतप्रधान इम्रान खान यांना आज इस्लामाबाद उच्च न्यायालयाने सर्व प्रकरणांमध्ये जामीन मंजूर केला आहे. यापूर्वी, अल कादिर ट्रस्ट प्रकरणात इम्रान खान यांना न्यायालयाने दोन आठवड्यांसाठी जामीन मंजूर केला होता.

इस्लामाबाद : पाकिस्तानचे माजी पंतप्रधान इम्रान खान यांना इस्लामाबाद उच्च न्यायालयाकडून दिलासा मिळाला आहे. तत्पूर्वी, अटकपूर्व जामिनासाठी कडेकोट बंदोबस्तात ते शुक्रवारी न्यायालयात हजर झाले. न्यायालयाने इम्रान खान यांना सर्व प्रकरणांमध्ये जामीन मंजूर केला आहे. यापूर्वी, अल कादिर ट्रस्ट प्रकरणात त्यांना न्यायालयाने दोन आठवड्यांसाठी जामीन मंजूर केला होता. अशाप्रकारे इम्रान खान यांना आता 9 मे पर्यंत अटकेतून दिलासा मिळाला आहे. दुसरीकडे, इमरान यांचा पक्ष पाकिस्तान तेहरीक - ए - इन्साफ (PTI) ने रॅलीची घोषणा करत समर्थकांना न्यायालयाजवळ जमण्याची अपील केली आहे.

मंगळवारी अटक केली होती : इमरान खान (70) यांना मंगळवारी अल - कादिर ट्रस्ट प्रकरणात इस्लामाबाद उच्च न्यायालयाच्या संकुलातून अटक करण्यात आली होती. उत्तरदायित्व न्यायालयाने भ्रष्टाचार प्रकरणी त्यांना आठ दिवसांची नॅशनल अकाउंटेबिलिटी ब्युरो (एनएबी) कोठडी सुनावली होती. खान यांना मोठा दिलासा देताना सर्वोच्च न्यायालयाने गुरुवारी त्यांची अटक 'बेकायदेशीर' ठरवली आणि त्यांची तात्काळ सुटका करण्याचे आदेश दिले. खान यांना सर्वोच्च न्यायालयाच्या संरक्षणात ठेवून सकाळी 11 वाजता उच्च न्यायालयात हजर करण्याचे निर्देश त्यांनी पोलिसांना दिले.

इमरान खान इस्लामाबादमध्ये भाषण करणार : सुप्रीम कोर्टाने सुनावणीदरम्यान सांगितले की, इमरान खान यांनी उच्च न्यायालयात शरणागती पत्करली होती, जिथे ते या प्रकरणात अटकपूर्व जामिनासाठी हजर झाले होते. त्यामुळे त्यांच्या अटकेमध्ये अडथळा आला होता तिथून ही संपूर्ण प्रक्रिया सुरू होईल. न्यायालयाने खान यांना त्यांच्या याचिकांवर उच्च न्यायालयाने दिलेल्या निर्णयाचे पालन करण्याचे निर्देशही दिले आहेत. दरम्यान, पीटीआयने एका संदेशात आपल्या समर्थकांना सकाळी 10 वाजता खान यांच्या भाषणासाठी उच्च न्यायालय परिसरापासून जवळच असलेल्या G - 13 भागात पोहोचण्यास सांगितले आहे. उच्च न्यायालयाकडून दिलासा मिळण्याची खात्री नसल्याने ते न्यायालयात हजर होण्यापूर्वी भाषण करू शकतात, असे सांगण्यात आले आहे. तसेच त्यांच्या सुरक्षेसाठी योग्य ती व्यवस्था करण्याचे आदेशही सर्वोच्च न्यायालयाने इस्लामाबाद पोलिसांना दिले आहेत.

हेही वाचा :