काबुल :गेल्या आठवडाभरात तालिबानने केलेल्या हल्ल्यांमध्ये अफगाणिस्तानचे २९१ सैनिक ठार झाल्याची माहिती तेथील सरकारने दिली आहे. यासोबतच, सुमारे ५५० सैनिक यात जखमी झाल्याचेही सांगण्यात येत आहे. २००१मध्ये अमेरिकेने केलेल्या हल्ल्यानंतर पहिल्यांदाच एका आठवड्याच्या कालावधीमध्ये अफगाणिस्तानचे एवढे सैनिक मारले गेले आहेत.
देशाच्या ३४ पैकी ३२ प्रांतांमध्ये तालिबानने एकूण ४२२ हल्ले केले आहेत. यामध्ये एएनडीएसएफचे (अफगाणिस्तान नॅशनल डिफेन्स अॅण्ड सिक्युरिटी फोर्सेस) २९१ सैनिक ठार, तर ५५० सैनिक जखमी झाले आहेत, अशी माहिती राष्ट्रीय सुरक्षा परिषदेचे प्रवक्ते जावेद फैसल यांनी दिली आहे. गेल्या १९ वर्षांमधील सर्वात भीषण असा हा आठवडा होता. यादरम्यान ४२ नागरिक देखील ठार झाले, तसेच १००हून अधिक नागरिक जखमी झाल्याचेही त्यांनी सांगितले.
अमेरिका आणि तालिबानमधील शांतता कराराच्या पार्श्वभूमीवर, अफगाणदेखील तालिबानसोबत चर्चा करण्याच्या तयारीत आहे. मात्र त्यापूर्वीच हे हल्ले सुरू झाले आहेत. २९ फेब्रुवारीला दोहामध्ये अमेरिका-तालिबान शांतता करारावर स्वाक्षरी करण्यात आली होती. ज्यानुसार २०२१च्या मध्यापर्यंत अमेरिका, अफगाणिस्तानमधील आपले सैन्य मायदेशी बोलावणार होते. याबदल्यात तालिबान आपले हल्ले थांबवणार होते. मात्र, त्यानंतर तालिबानने या करारापासून पाठ फिरवली आणि अफगाणिस्तानने ताब्यात घेतलेल्या तालिबानींना सोडण्याची अट समोर ठेवली. यानुसार ५,००० तालिबानींच्या बदल्यात १,००० सैनिक ते सोडणार होते. मात्र यातही काही बेबनाव झाल्यामुळे तालिबानने अफगाणिस्तानवर हल्ले करण्यास सुरुवात केली होती.