लंडन - इंग्लंडचे पंतप्रधान बोरिस जॉन्सन यांना अजूनही कोरोनाची लक्षणे दिसून येत असल्याची माहिती प्रशासनाने दिली आहे. २७ मार्चला त्यांनी स्व-विलगीकरणात जाण्याचा निर्णय घेतला होता. त्यांचा सात दिवसांचा विलगीकरण कालावधी संपण्यासाठी एक दिवस बाकी आहे, मात्र त्यांना अद्यापही कोरोनाची लक्षणे दिसून येत आहेत.
२७ मार्चला स्व-विलगीकरणात गेल्यानंतर ते व्हिडिओ कॉन्फरन्सिंगद्वारे कामकाज पाहत होते. शुक्रवारी ते विलगीकरणातून बाहेर येण्याची शक्यता याआधी व्यक्त करण्यात येत होती. याबाबत विचारणा केली असता, एका प्रवक्त्याने सांगितले, की आम्ही पीएचईने दिलेल्या सूचनांचे पालन करत आहोत. त्यामुळे सात दिवसांच्या आत ते बाहेर येणार नाहीत. तसेच, त्यांना दिसणारी लक्षणे ही अतीशय सौम्य स्वरुपाचे असल्याचेही प्रवक्त्याने स्पष्ट केले.