मुंबई - Salman Khan : सलमान खान त्याच्या नुकत्याच प्रदर्शित झालेल्या स्पाय अ‍ॅक्शन थ्रिलर 'टायगर 3' या चित्रपटामुळे चर्चेत आहे. भाईजानचे चाहते त्याच्या चित्रपटाला भरभरून प्रेम देत आहेत. या चित्रपटानं जगभरात 400 कोटींचा टप्पा ओलांडलाय. देशांतर्गत बॉक्स ऑफिसवर हा चित्रपट 300 कोटीचे कलेक्शन करण्याच्या मार्गावर आहे. यशराज स्पाय युनिव्हर्सचा 'टायगर 3' हा चित्रपट 12 नोव्हेंबर रोजी दिवाळीच्या मुहुर्तावर प्रदर्शित झाला होता. या चित्रपटात सलमान खान, कतरिना कैफ, इमरान हाश्मी यांच्या प्रमुख भूमिकेत दिसणार आहेत. या चित्रपटात शाहरुख खान आणि हृतिक रोशन कॅमिओ केला आहे. दरम्यान भाईजानबद्दल आणखी एक मोठी बातमी समोर आली आहे. सलमान खानचा आणखी एक चित्रपट चाहत्यांच्या भेटीला येणार आहे.
सलमान खाननं आगामी चित्रपटाबद्दल सांगितलं : सलमान खाननं अलीकडेच एका मुलाखतीदरम्यान त्याच्या आगामी चित्रपटाबद्दल खुलासा केला. सलमानच्या आगामी चित्रपटाचं शीर्षक 'द बुल' असं असेल. मिळालेल्या माहितीनुसार, हा चित्रपट करण जोहरच्या 'धर्मा प्रॉडक्शन'चा आहे. या चित्रपटामध्ये सलमान खान एका आर्मी ऑफिसरची भूमिका साकारणार असल्याचं सांगितलं जात आहे. या चित्रपटासाठी सलमान आपले केसही कमी करणार आहे. 'द बुल' या चित्रपटाचे दिग्दर्शन विष्णू वर्धन हे करणार आहेत. हा चित्रपट 2024 च्या ईदमध्ये प्रदर्शित होईल, असं म्हटलं जात आहे. 'द बुल' हा ब्रिगेडियर फारूक बुलसाराचा जीवनपट आहे, ज्यांनी 1988 मध्ये मालदीवमध्ये ऑपरेशन कॅक्टसचं नेतृत्व केलं होतं. सलमान 25 वर्षांनंतर करण जोहरसोबत काम करेल.