मुंबई - वाढदिवसाला आपल्या प्रियजनांकडून लाड आणि कौतुक मिळाल्यानं माणसाच्या अंगावरचं मूठभर मांस वाढतं असं म्हणतात. या दिवशी लोक आपली आठवण काढतात, शुभेच्छा देतात, प्रेम करतात ही भावनाच मंतरुन टाकणारी असते. हाच अनुभव आज अभिनेत्री अनन्या पांडे घेतेय. ती आपला 25 वा वाढदिवस आनंदानं साजरा करण्यासाठी सज्ज झालीय. अनन्याचे चाहते, मित्रमंडळी आणि कुटुंबातील सदस्यही तिच्या वाढदिवसाला खूप प्रेमाने खास बनवणार आहेत.
तिच्या जवळच्या मैत्रिणी सुहाना खान आणि शनाया कपूर यांनी त्यांच्या सोशल मीडियावरुन अनन्याला शुभेच्छा देताना तिच्यासोबतचे फोटो शेअर केलेत. सुहानानं अनन्यासोबतचा स्वतःचा एक जबरदस्त फोटो अपलोड केलाय आणि सदिच्छा देताना, 'माझ्या बेस्टीला वाढदिवसाच्या शुभेच्छा.', असं लिहिलंय.
दुसऱ्या एका इन्स्टाग्राम स्टोरीमध्ये तिनं 'लव्ह यू अ‍ॅण्ड एव्हर', असं लिहित सुहानानं अनन्या आणि तिची लहान बहीण रिसा पांडेसोबतचा फोटो शेअर केलाय. फोटोत तिघीही सुशी खाताना दिसताहेत. तिसर्‍या फोटोत सुहाना, अनन्या आणि शनाया काळ्या रंगाच्या मॅचिंग ड्रेसमध्ये क्षण एन्जॉय करताना दिसताहेत.
शनायाने 'ड्रीम गर्ल2' अनन्या पांडेसोबत एक सेल्फी पोस्ट करून तिला वाढदिवसाच्या शुभेच्छा दिल्यात. शनाया आणि अनन्याची मैत्रीही खूप खास आहे. त्या एकमेकांच्या सर्व आनंदी क्षणाला संपर्कात राहून एन्जॉय करताना दिसतात. पुढील पोस्टमध्ये शनायानं तिच्या सोशल मीडियावर स्वतःचा आणि अनन्याचा बालपणीचा एक सुंदर व्हिडिओ शेअर केला आहे. 'लव्ह यू', असं कॅप्शन या व्हिडिओला तिनं दिलंय.
अनन्या ही अभिनेता चंकी पांडे आणि भावना पांडे यांची थोरली मुलगी आहे. तिची स्टार किड्ससोबत चांगली मैत्री आहे. सुहाना ही शाहरुख खान आणि गौरी खानची मुलगी आहे आणि शनाया ही संजय कपूर आणि त्याची पत्नी महीप कपूर यांची लाडकी लेक आहे. तिघींची मैत्री सर्वश्रृत आहे. तिन्ही स्टार किड्सची फॅन फॉलोइंग प्रचंड आहे. सुहाना आणि शनाया यांचे डेब्यू अ‍ॅक्टिंग प्रोजेक्ट्स अद्याप रिलीज व्हायचे आहेत, तर अनन्यानं आधीच तिच्या अभिनयाची चमक दाखवून फिल्म इंडस्ट्रीत स्वत:चे स्थान निर्माण केलंय.