मुंबई : अल्लू अर्जुनला नुकताच सर्वोत्कृष्ट अभिनेत्याचा राष्ट्रीय पुरस्कार मिळाला आहे. अल्लू अर्जुनने सर्वोत्कृष्ट अभिनेत्याचा पुरस्कार जिंकल्यानंतर पुन्हा एकदा तो चर्चेत आला आहे. २०२१ चा ब्लॉकबस्टर चित्रपट 'पुष्पा: द राइज' मधील त्याच्या तडफदार अभिनयासाठी त्याला पहिला राष्ट्रीय पुरस्कार मिळाला आहे. तेलुगु चित्रपटसृष्टीत याबाबत आनंद साजरा केला जात आहे. राष्ट्रीय पुरस्कार जिंकणारा तो पहिला तेलुगु स्टार बनला आहे. अल्लू अर्जुनच्या विजयाचा आनंद साजरा करत चुलत भाऊ राम चरण आणि त्याची पत्नी उपासनाने त्याला एक सरप्राईज दिले आहे.
राम चरण आणि उपासनाने दिले सरप्राईज : राम चरण आणि त्याची पत्नी उपासना यांनी अल्लू अर्जुनला फुलांसह एक सुंदर चिठ्ठी पाठवली. अल्लू अर्जुनला राम चरणकडून असं प्रेम आणि भेटवस्तू मिळाल्याने तो खूप आनंदी झाला. त्यानंतर त्यानं त्याच्या इंस्टाग्राम स्टोरीवर या भेटवस्तूचा एक फोटो शेअर करत लिहिले, 'खूप खूप धन्यवाद'. दरम्यान आता अल्लू अर्जुनचे चाहते त्याच्या विजयाचा आनंद साजरा करत आहेत. आजकाल अल्लू अर्जुन हा 'पुष्पा' चित्रपटाच्या सीक्वलच्या शूटिंगमध्ये व्यग्र आहे, ज्याचे नाव 'पुष्पा: द रुल' आहे. सुकुमार दिग्दर्शित 'पुष्पा' हा चित्रपट बॉक्स ऑफिसवर खूप गाजला होता. याशिवाय या चित्रपटातील गाणंही खूप हिट झालं होतं. आता अल्लू अर्जुन पुन्हा एकदा बॉक्स ऑफिसवर धमाकेदार एंट्री करणार आहे. 'पुष्पा २'मध्ये तो एका वेगळ्या अवतारात प्रेक्षकांना पाहायला मिळणार आहे. हा चित्रपट लवकरच प्रेक्षकांच्या भेटीला येणार आहे.