मुंबई Vijay Deverakonda : विजय देवरकोंडा सध्या त्याच्या 'खुशी' चित्रपटासाठी चर्चेत आहे. अलीकडेच विजयनं 1 कोटी देणगी देण्याची घोषणा केली होती. त्यानंतर विजयचं अनेकजणांनी सोशल मीडियावर कौतुक केलं होतं. विजयचं नाव हे दक्षिणेतील हिट कलाकारांमध्ये गणलं जातं. त्याचा 'लाइगर' हा चित्रपट अतिशय वाईटरित्या फ्लॉप झाला होता. दरम्यान आता नुकत्याच प्रदर्शित झालेल्या 'खुशी' चित्रपटाला चांगला प्रतिसाद चाहते देत आहेत. आता विजय आणि सामंथा रुथ प्रभू यांचा 'खुशी' चित्रपट 100 कोटींच्या जवळपास पोहोचणार आहे. 'खुशी'च्या यशामुळे विजय 1 कोटी रुपये गरजू कुटुंबांना देणार आहे. विजयचे हे पाऊल काही लोकांना आता खटकत आहे.
अभिषेक पिक्चर्सने केले ट्विट :अभिषेक पिक्चर्सनं विजयच्या 1 कोटी रुपयांच्या देणगीसंदर्भात एक्सवर एक पोस्ट टाकली आहे. या ट्विटमध्ये त्यांनी लिहिले आहे की, 'प्रिय विजय देवरकोंडा, 'वर्ल्ड फेमस लव्हर'च्या वितरणात आमचं 8 कोटी रुपयांचं नुकसान झालं होतं. परंतु यावर कोणीही प्रतिक्रिया दिली नाही. आता तुम्ही मोठ्या मनानं 1 कोटी रुपये दान करत आहात. आपणास विनंती आहे की प्रदर्शक आणि वितरकांनी देखील याची काळजी घ्यावी, अशी त्यांनी पोस्ट केली आहे. वर्ल्ड फेमस लव्हरच्या मेकर्सची ही पोस्ट सध्या सोशल मीडियावर व्हायरल होत आहे. 'वर्ल्ड फेमस लव्हर' हा चित्रपट 14 फेब्रुवारी 2020 रोजी व्हॅलेंटाईन डेच्या निमित्ताने प्रदर्शित झाला होता. या चित्रपटाचं एकूण बजेट 35 कोटी रुपये होतं. या चित्रपटानं मात्र रूपेरी पडद्यावर फक्त 16 कोटीचा व्यवसाय केला होता.