मुंबई - अभिनेत्री कंगना रणौत निर्माता करण जोहरवर टीका करण्याची एकही संधी सोडत नाही. करणला ती नेहमी घराणेशाहीचा मुख्य स्तंभ मानत आली आहे. 'कॉफी विथ करण'च्या एका एपिसोडमध्ये पहिल्यांदा थेट नेपोटिझमचा आरोप केल्यानंतर अनेक वर्ष या आरोपांचा पाठपुरवा ती करत आली आहे. गेली सहा वर्षे करण जोहर दिग्दर्शन करत नव्हता. आता तो 'रॉकी और रानी की प्रेम कहानी' चित्रपटातून तो दिग्दर्शनात परत आला आहे. त्याचा चित्रपट रिलीज झाल्यानंतर कंगनाने पुन्हा त्याच्यावर निशाणा साधायचा प्रयत्न केला आहे. परंतु यावेळी तिने थेट नाव न घेता हल्ला बोल केला आहे.
कंगना रणौतची ही पोस्ट थेट नसली तरी करण जोहरशी संबंधीत आहे. कारण त्याचा चित्रपट नुकताच रिलीज झाला आहे. कंगनाने लिहिलंय, 'माझ्याबद्दल सकाळपासून बिनबुडाची एकही नकारात्मक बातमी आलेली नाही. आणि कुणी मीडियाला खोटे उदाहरणही पाठवलेले नाही. माझ्या प्रोजेक्टबद्दल काहीच अफवाही पसरवली जात नाही आणि जुन्या चित्रपटातील माझे कामुक दृष्य प्रसारितही केले जात नाही. इतकी शांतता कशी काय आहे? कुठे लंकेत आग तर लागलेली नाही आहे ना? कोणी तरी शोधा की, आज नेपो गँग कुठं अडकली आहे?'
आता कंगनाने उल्लेख केलेली 'नेपो गँग' म्हणजे कोण हे सूज्ञास अधिक सांगणे न लगे. करण जोहर आणि त्याच्याशी संबंधित सर्व कलाकार यांच्यावर कंगना नेहमी भडकलेली असते. 'रॉकी ऑर रानी की प्रेम कहानी'मध्ये आलिया भट्ट मुख्य भूमिकेत आहे. आलियावर टीका करण्यासाठी कंगनाला कोणतेही निमित्त लागत नाही. अलिकडे तिने आलिया आणि रणबीर कपूर यांचे लग्न खोटे असल्याचे म्हटले होते. ते दोघेही एका घरात राहतात पण ते वेगवेगळ्या बेडरुममध्ये झोपतात, असेही ती म्हणाली होती. करण जोहरने 'ब्रम्हास्त्र'सह तिने चित्रपटांचे आमिष दाखवल्यानंतर रणबीरने कराराचा भाग म्हणून आलियाशी लग्न केले होते, असाही तिने नवा शोध लावला होता. थोडक्यात करण जोहर आणि त्याच्याशी संबंधित लोक यांना ती 'नेपो गँग' म्हणते आणि त्यांच्यावर टीकास्त्र सोडते. तिच्याबद्दल कोणी काहीच टीका करत नाही म्हणटल्यावर तिने ही पोस्ट लिहून वाद उकरून काढायचा प्रयत्न केला आहे.