मुंबई - Thalaivar 170 :सुपरस्टार रजनीकांतचा शेवटचा रिलीज झालेल्या 'जेलर'नं बॉक्स ऑफिसवर प्रचंड कमाई केली. या चित्रपटानं 600 कोटींहून अधिक कमाई केली असून आता 'थलैवर 170'साठी चाहते उत्सुक आहेत. राष्ट्रीय पुरस्कार विजेते दिग्दर्शक टीजे ज्ञानवेल यांनी दिग्दर्शित केलेल्या 'थलैवर 170'चे शूटिंग नुकतेच केरळमध्ये सुरू झालंय. 'थलैवर 170' चित्रपटामध्ये 33 वर्षांनंतर रजनीकांत अमिताभ बच्चन एकत्र दिसणार आहेत. 'थलैवर 170'च्या सेटवरील रजनीकांतनं अमिताभ बच्चन सोबतचा एक फोटो सोशल मीडियावर शेअर केला आहे. या फोटोमध्ये दोघांचाही बॉन्ड खूप खास दिसत आहे.
रजनीकांतची सोशल मीडिया पोस्ट :रजनीकांत यांनी 'एक्स'वर फोटो शेअर करत लिहिलं, '33 वर्षांनंतर... मी पुन्हा एकदा माझे गुरू, अमिताभ बच्चन यांच्यासोबत 'थलैवर 170' मध्ये काम करणार आहे. लायका प्रॉडक्शन चित्रपटाचे दिग्दर्शन टीजे ज्ञानवेल करणार आहेत. माझे मन आनंदाने उड्या मारत आहे'. या पोस्टवर अनेकांनी या जोडीवर प्रेमाचा वर्षाव केला आहे. अमिताभ बच्चन आणि रजनीकांत यांच्या व्यतिरिक्त, चित्रपटात राणा दग्गुबती, अर्जुन सर्जा फहद फासिल, रितिका सिंग, मंजू वॉरियर यांच्यासह आणखी काही कलाकार दिसणार आहेत. 'थलैवर 170'चं संगीत अनिरुद्ध रविचंदरनं दिलं आहे. यापूर्वी त्यानं रजनीकांत स्टारर 'जेलर' आणि शाहरुख खान स्टारर 'जवान' या चित्रपटांसाठी संगीत दिलं होतं.