मुंबई - दीपिका पदुकोण आणि रणवीर सिंग हे बॉलिवूडमधील सर्वाधिक लोकप्रिय जोडपं मानलं जात. ही जोडी 'कॉफी विथ करण 8' च्या पहिल्या भागात आली होती. यावेळी नेहमीच्या शिरस्त्या प्रमाणे त्यांनी भरपूर गप्पा मारल्या, अनेक नव्या गोष्टींचे खुलासे केले आणि त्यांच्या लग्नाचा व्हिडिओही चाहत्यांसाठी शेअर केला. दीपिका पदुकोणच्या 'ये जवानी है दिवानी' मधील वेडिंग सिक्वेन्स शूट करणाऱ्या द वेडिंग फिल्मर्सने लग्नाचा हा व्हिडिओ बनवला होता.
द वेडिंग फिल्मर्सने इंस्टाग्रामवर व्हिडिओ शेअर केला आणि लिहिले,' 'ये जवानी है दिवानी' चित्रपटातील 'कबीरा' गाण्याच्या शुटिंगदरम्यान मला दिग्दर्शन करण्याची संधी मिळाली होती. एका रम्य संध्याकाळी तलावाच्या कडेला ती हळुवारपणे म्हणाली, जेव्हा माझ्या लग्नाची वेळ येईल तेव्हा तुम्ही ते कॅप्चर कराल, तर मला सन्मानाचं वाटेल. तिच्या या बोलण्याचं मला आश्चर्य वाटले. आता अनेक वर्षांनी तिच्या लग्नाचा व्हिडिओ प्रदर्शित करताना त्या कुजबुजीत दिलेल्या हळुवार वचनाची आठवण येते. निसर्गाच्या सुंदर पार्श्वभूमीवर रणवीर आणि दीपिकाचं जादुई मिलन उलगडून दाखवण्याचा मान द वेडिंग फिल्मरला मिळाला. हे केवळ लग्नाचं डॉक्युमेंटेशन नव्हतं कर प्रेमाची कहाणी विणण्यासारखं होतं. काही कथा हृदयाच्या इतक्या जवळ असतात की त्या जवळ ठेवल्या जातात, आणि त्यांची ही कथा काही काळासाठी एकटीच असावी अशी त्यांची इच्छा होती. आमच्या उद्योगाची १३ वर्षे साजरी करत असताना रणवीर दीपिकाच्या विवाहाची ही सुंदर फिल्म 'कॉफी विथ करण'च्या प्रतिष्ठित व्यासपीठावर प्रीमियर करताना एक मैलाचा दगड गाठल्यासारखं वाटतंय.'
व्हिडिओची सुरुवात रणवीरच्या बोलण्यानं होते. तो म्हणतो की, त्यानं दीपिकाशी लग्न करायचं आधीच ठरवलं होतं आणि अखेर तो दिवस उजाडला आहे. यामध्ये रणवीर आणि दीपिकाच्या विवााहातील सुंदर क्षणांसह त्यांच्या कुटुंबीयांची मनोगतंही ऐकायला मिळतं. दीपिकाचे वडील आणि दिग्गज बॅडमिंटनपटू प्रकाश पदुकोण प्रकाश पदुकोण व्हिडिओमध्ये म्हणतात की, आम्ही चारही जण खूप बोरींग माणसं आहोत पण रणवीरमुळे आमच्यातही उत्साह संचारतो. व्हिडिओमध्ये तलावाजवळील मेहंदी समारंभात रणवीरचा डान्स, दीपिकाचं सजणं, मंडपात होणारे विवाह विधी आणि आनंदी सोहळा पाहायला मिळतो.
इतकंच नाही तर व्हिडिओमध्ये रणवीरला दीपिकाच्या खोलीबाहेर वाट पाहण्यासाठी थांबलेले दाखवण्यात आलंय आणि तो आपल्या नवविवाहित पत्नीला ‘लव्ह यू बेबी’ म्हणत प्रेमानं हाक मारताना दिसतो. व्हिडिओत एका क्लिपमध्ये दीपिका म्हणते की, 'मी ज्याच्याकडे आकर्षित झाले त्याला साऱ्या जगानं पाहिलंय. त्याची दुसरी बाजू अतिशय शांत, बुद्धिमान आणि संवेदनशील आहे. तो रडतो हे सत्य आहे आणि मला ते आवडते. तो जे काही करतो ते अगदी मनापासून करतो.'
रणवीर दीपिकाचा हा व्हिडिओ पाहिल्यानंतर करण जोहरही भावूक झाला. 'दोघांची गुपचूप एंगेजमेंट झाली आहे का', याचीही चौकशी करण जोहरने चर्चेच्यादरम्यान केली. यावर रणवीरनं सांगितलं की, '2015 मध्ये मी तिला प्रपोज केले होते, इसके पहले की कोई और आ जाए मैं जाके चप्पल रख देता हू.'