सोलापूर - राज्याचे राज्यपाल महामहिम भगतसिंग कोश्यारी यांनी काल अक्कलकोटच्या स्वामी समर्थांचे तर आज पंढरपूरमध्ये श्री विठ्ठल रुक्मिणीचे दर्शन घेतले. पुण्यश्लोक अहिल्यादेवी होळकर सोलापूर विद्यापीठात सुरू असलेल्या 23 व्या आंतर विद्यापीठ क्रीडा महोत्सवाच्या उद्घाटन व दीक्षांत समारंभासाठी ते सोलापूर दौऱ्यावर आले आहेत.
विद्यापीठांच्या सोहळ्याव्यतिरिक्त मिळणाऱ्या वेळेत कोश्यारी यांनी तीर्थाटन करणे पसंत केले आहे. क्रीडा महोत्सवाचे उद्घाटन केल्यानंतर कोश्यारी यांनी गुरूवारी अक्कलकोट येथे श्री स्वामी समर्थ महाराजांचे ही दर्शन घेतले. तर आज दीक्षांत सोहळ्यापूर्वी पंढरपूरला जाऊन श्री विठ्ठल रुक्मिणीचे दर्शन घेतले. यावेळी मंदिर समितीच्यावतीने त्यांना श्रींची प्रतिमा देऊन राज्यपालांचा सत्कार करण्यात आला.
या दौऱ्याच्या निमित्ताने राज्यपालांनी सामाजिक संस्था, शैक्षणिक संस्थानां भेटी देणे अपेक्षित असताना. कोश्यारी यांनी तीर्थक्षेत्र वारी केल्यामुळे त्यांनी दैववादाला चालना दिल्याची चर्चा सोलापूर जिल्ह्यात सुरु आहे.