नाशिक- राज्यभर गाजलेले भंगार बाजार अतिक्रमण पुन्हा एकदा वादात सापडले आहे. भंगार व्यावसायिकांनी या जागेवर पुन्हा अतिक्रमण केले आहे. तर पालिकेने या अतिक्रमणावर पुन्हा कारवाई करण्याची नोटीस दिली आहे.
कारवाईबाबत बोलताना याचिकाकर्ते दिलीप दातीर
नाशिकमधील बहुचर्चित अनधिकृत भंगार बाजार हटाव मोहीम पुन्हा एकदा चर्चेत आली आहे. वर्षभरापूर्वी पालिकेने हजारो पोलिसांच्या मदतीने उच्च न्यायालयाच्या आदेशान्वये नाशिक अंबड लिंक परिसरातील अनधिकृतपणे उभारलेले भंगार व्यावसायिकांचे शेड जमीनदोस्त केले होते. मात्र काही महिने उलटत नाही तोच व्यवसायिकांनी पुन्हा एकदा त्याच जागेवर अनधिकृतपणे व्यवसाय थाटला आहे. त्यामुळे या अतिक्रमणाविरोधात न्यायालयात लढा देणारे नगरसेवक दिलीप दातीर यांनी पालिका प्रशासनाच्या कारभारावर नाराजी व्यक्त करत भंगार मार्केट तातडीने हटविण्याची मागणी केली आहे.
दरम्यान गेल्या वर्षभरापूर्वी अंबड लिंक रोडवरील भंगार बाजार हटविण्याससाठी पोलिसांकडून हजारो पोलिसांचा बंदोबस्त देण्यात येवून तब्बल 8 दिवस ही कारवाई करण्यात आली होती. मात्र पालिकेच्या उदासिनतेमुळे याच जागेवर या भंगार व्यावसायिकानी बस्तान मांडल्याने पोलीसही हतबल झाले आहेत. तर पालिका प्रशासन आगामी गणेशोउत्सवानंतर कारवाईवर ठाम आहे.
भंगार बाजाराला उच्च न्यायालयाने देखील अनधिकृत ठरवले आहे. असे असले तरी या परिसरात अनधिकृतपणे भंगार व्यवसाय करणाऱ्या व्यवसायिकांनी पालिकेवर दबाव आणण्यासाठी पालिका मुख्यालयावर मोर्चा काढत दबाव निर्माण करण्याचा प्रयत्न केला आहे. भंगार व्यावसायिकांचा हा मोर्चा म्हणजे चोराच्या उलट्या बोंबा असून न्यायालयाचा अवमान करणाऱ्या अशा मोर्चेकऱ्यांना पोलीस परवानगी देताच कसे असा सवालही नाशिककर उपस्थित करत आहेत. त्यामुळे आता राज्यभर गाजलेल्या नाशिकमधील भंगार व्यावसायिकांच्या अनधिकृत दुकानांवर पालिका प्रशासन कारवाई करणार का? की भंगार व्यावसायिकांच्या मोर्चाच्या दबावाला बळी पडणार हे बघणे महत्त्वाचे ठरणार आहे.
