मराठा आरक्षण : आंदोलनाची रुपरेषा ठरविण्याकरता बैठकीचे आयोजन; उदयनराजे भोसले अनुपस्थित

सर्वोच्च न्यायालयाने मराठा आरक्षणाला स्थगिती दिल्यानंतर राज्यात पुन्हा मराठा समाज आंदोलन करणार आहेत. त्या पार्श्वभूमीवर राज्यव्यापी आंदोलनाची रुपरेषा निश्चित करण्यात येणार आहे.

नवी मुंबई -मराठा समाजाला आरक्षण मिळावे, यासाठी व्यापक आंदोलनाची दिशा ठरविण्यात येणार आहे. हे आंदोलन आणखी कसे व्यापक होईल, यासंदर्भात नवी मुंबईत राज्यस्तरीय बैठकीचे आयोजन करण्यात आले आहे. मात्र, या बैठकीला उदयनराजे भोसले अनुपस्थित राहिले आहेत.

छत्रपती संभाजीराजे भोसले व उदयनराजे भोसले यांच्या नेतृत्वाखाली नवी मुंबईत राज्यस्तरीय बैठक पार पडणार होती. या बैठकीला छत्रपती संभाजीराजे भोसले व उदयनराजे भोसले दोन्ही राजे एकाच मंचावर उपस्थित राहणार असल्याने सर्वांमध्ये उत्सुकता होती. मात्र, उदयनराजे या बैठकीला अनुपस्थित राहत असल्याने सर्वांचा हिरमोड झाला आहे. ही बैठक एपीएमसी मार्केटमधील माथाडी भवनात पार पडत आहे. यावेळी मराठा मोर्चाच्या विविध संघटनांचे प्रतिनिधी उपस्थित आहेत.

मराठा समाजाला आर्थिक निकषावर आरक्षण मिळावे, यासाठी मराठा क्रांती मोर्चाच्या माध्यमातून 2016पासून राज्यव्यापी आंदोलने करण्यात आली आहेत. त्यासाठी मराठा समाजाने बहुसंख्येने राज्यभरात ऐतिहासिक मूक मोर्चे काढले आहेत. यादरम्यान उपसमिती गठीत करून तत्कालीन सरकारने समितीच्या माध्यमातून सर्व घटकांची चर्चा केली. एसईबीसी या प्रवर्गात मराठा समाजाला 16 टक्के आरक्षणही जाहीर केले होते. विधिमंडळात हे आरक्षण मंजूर करून राज्यपालांच्या माध्यमातून आरक्षणाचा अध्यादेश काढला. यावर मुंबई उच्च न्यायालयात याचिका दाखल करण्यात आली. याचिकेवरील सुनावणीनंतर मराठा समाजाला शिक्षणासाठी 12 टक्के व नोकरीसाठी 13 टक्के आरक्षण देण्याचा राज्य सरकारने आदेश काढले. या निर्णयाविरोधात दाखल केलेल्या याचिकेवरील सुनावणीत सर्वोच्च न्यायालयाने आरक्षणाला स्थगिती दिली आहे. यामुळे मराठा समाजातून पुन्हा आरक्षणाची मागणी करण्यात येत आहे. राज्यात मोठ्या प्रमाणात आंदोलने करण्यात येत आहेत.

राज्य सरकारने मराठा समाजाला नोकरीत व शिक्षणात आरक्षण द्यावे, अशी मागणी मराठा समाजाकडून करण्यात येत आहे. त्या संदर्भात माथाडी भवनमध्ये या आंदोलनाची रुपरेषा ठरविण्यासाठी बैठकीचे आयोजन करण्यात आले आहे. या बैठकीत छत्रपती संभाजीराजे मराठा आरक्षणासाठी मार्गदर्शन करत आहेत.