Top 10 @ 7 PM : सायंकाळी सातच्या ठळक बातम्या!

दिवसभरातील महत्त्वाच्या बातम्या वाचा एका क्लिकवर...

• ठाणे -२०१४ साली वाशी टोल नाका येथे मनसेच्या कार्यकत्यांनी खळ्‌खट्याक आंदोलन केल्याने कार्यकर्त्यांसह मनसे प्रमुख राज ठाकरे यांच्यावर वाशी पोलीस ठाण्यात गुन्हा दाखल करण्यात आला होता. याप्रकरणी त्यांना अनेकदा न्यायालयाकडून समन्स बजावण्यात आला होता. मात्र, राज ठाकरे उपस्थित न राहिल्याने अखेर बेलापूर न्यायालयाने त्यांच्या विरोधात अटक वॉरंट काढले होते. त्यामुळे आज राज ठाकरे स्वत: न्यायालयात हजर राहणार आहेत. तिथून ते सिवूड येथील मनसे कार्यालयाला भेट देणार आहेत. यावेळी चार ते पाच हजार कार्यकर्ते राज ठाकरे यांच्या स्वागताला येणार असल्याची माहिती आहे.

सविस्तर वाचा-LIVE UPDATE : मनसे अध्यक्ष राज ठाकरे वाशी न्यायालयाकडून जामीन मंजूर

• कोल्हापूर - येथील छत्रपती प्रमिलाराजे शासकीय रुग्णालयात रुग्णांच्या जीवाशी खेळ केल्याचा धक्कादायक प्रकार समोर आला आहे. चक्क मुदत संपलेले सलाईन रुग्णाला दिल्याचा प्रकार उघडकीस आला आहे. या अक्षम्य हलगर्जीपणावरून आता सीपीआर रुग्णालयावर टीकेची झोड उठताना दिसत आहे.

सविस्तर वाचा-कोल्हापुरात सीपीआरमध्ये रुग्णाच्या जीवाशी खेळ, मुदत संपलेले सलाईन रुग्णाला दिले

• नाशिक -कारमध्ये चालक बसलेला असताना दुचाकीस्वारांनी काच फोडून लाखोंची रोकड लांबविल्याची घटना नाशकात घडली आहे. येथील मुंबई नाका पोलीस ठाण्यापासून हाकेच्या अंतरावर काल दुपारच्या सुमारास ही घटना घडली आहे.

सविस्तर वाचा-नाशिक : अज्ञात चोरट्यांनी कारची काच फोडून 15 लाख लांबवले

• गंगापूर(औरंगाबाद) : टायर फुटल्याने अनियंत्रित झालेले ट्रॅक्टर नदीत कोसळून झालेल्या भीषण अपघातात एक जण ठार, तर दहा जण जखमी झाल्याची घटना औरंगाबादच्या गंगापूरमध्ये घडली आहे. जखमींना उपचारासाठी औरंगाबादमधील रुग्णालयात दाखल करण्यात आले आहे.

सविस्तर वाचा-गंगापुरात ट्रॅक्टर नदीत कोसळून एक ठार, 10 जखमी

• मुंबई : देशाची दुसरी खासगी ट्रेन असलेली मुंबई-अहमदाबाद तेजस एक्सप्रेस येत्या 14 फेब्रुवारी म्हणजेच 'व्हॅलेंटाईन डे'च्या मूहुर्तावर पुन्हा सुरू करण्याचा निर्णय इंडियन रेल्वे केटरिंग अ‍ॅण्ड टुरिझम कॉपोर्रेशनकडून घेण्यात आला आहे. त्यामुळे मुंबई ते अहमदाबाद प्रवास करणाऱ्या प्रवाशांना मोठा दिलासा मिळणार आहे. 'व्हॅलेंटाईन डे'च्या दिवशी तेजस एक्स्प्रेसमधून प्रवास करणाऱ्या नवीन जोडप्यांचे आयआरसीटीसीकडून थाटात स्वागत केले जाणार आहे.

• मुंबई : मानखुर्दमधील गोदामांना लागलेल्या आगीवर तब्बल 20 तासांनंतर नियंत्रण मिळविण्यात अग्निशमन दलाला यश आले आहे. शुक्रवार दुपारपासून या आगीवर नियंत्रण मिळविण्याचे प्रयत्न अग्निशमन दलाकडून केले जात होते. अग्निशमन दलाच्या 30 हून अधिक बंबांच्या सहाय्याने आगीवर नियंत्रण मिळविण्यात आले.

• इस्लामाबाद -पाकिस्तानचे पंतप्रधान इम्रान खान यांनी पुन्हा एकदा काश्मीरप्रश्नी वक्तव्य केले आहे. पाकव्याप्त काश्मीरमधील नागरिकांना पाकिस्तानात राहण्याचे किंवा स्वतंत्र राहण्याचा अधिकार देऊ, त्यासाठी सार्वमत घेऊ, असे त्यांनी म्हटले आहे. सोबतच भारतासोबत चर्चा सुरू करण्याची इच्छा त्यांनी व्यक्त केली आहे. मात्र, त्यासाठी काश्मीरला विशेष दर्जा पुन्हा देण्याची अट घातली आहे.

सविस्तर वाचा-काश्मीरमध्ये सार्वमत घेण्यास आम्ही तयार - इम्रान खान

• चेन्नई -चेपॉक येथे सुरू असलेल्या भारताविरुद्धच्या पहिल्या कसोटीच्या दुसऱ्या दिवशी इंग्लंडने आपली दमदार फलंदाजी सुरूच ठेवली आहे. उपाहारापर्यंत पाहुण्या संघाने ३ गडी गमावत ३५५ धावा केल्या. दुसऱ्या दिवसाच्या पहिल्या सत्रात भारतीय गोलंदाज एकही विकेट घेऊ शकले नाहीत. इंग्लंडचा कर्णधार जो रूटने दीडशतकी खेळी केली आहे. तर बेन स्टोक्सने अर्धशतक पूर्ण केले आहे.

सविस्तर वाचा-IND vs ENG : रूट-स्टोक्समुळे टीम इंडिया हैराण

• मुंबई -कोरोना संक्रमणानंतर मनोरंजनसृष्टी आता थोडी सावरताना दिसत आहे. गेल्या वर्षीच्या मध्यावर लॉकडाउन सुरू असताना शुटिंग्सची परवानगी देण्यात आली होती. आता तब्बल ११ महिन्यांनंतर चित्रपटगृह पूर्णक्षमतेने सुरू करण्याची सरकारने घोषणा केली आहे. निर्मातेसुद्धा आपले चित्रपट चित्रपटगृहांत प्रदर्शित व्हावेत यासाठी आग्रही आहेत. त्यामुळेच चित्रपट प्रदर्शनाच्या तारखादेखील घोषित होऊ लागल्या आहेत. निर्माते, दिग्दर्शकांसोबत सर्वजण त्यांचे सिनेमे प्रदर्शित करण्याची तयारी करत असून, हिंदीसोबतच अनेक मराठी चित्रपटांनी त्यांच्या प्रदर्शनाच्या तारखा घोषित केल्या आहेत.

सविस्तर वाचा-क्रिकेटची पार्श्वभूमी ल्यालेल्या ‘फ्री हिट दणका' मधून दिसणार ‘फॅन्ड्री’फेम सोमनाथ अवघडे!