मेट्रो 1 : दुसऱ्या दिवशी 11 हजार 808 प्रवाशांनी केला मेट्रोने प्रवास

वर्सोवा-अंधेरी-घाटकोपर मेट्रो 1 कालपासून वाहतूक सेवेत दाखल झाली आहे. काल पहिल्या दिवशी मेट्रोला खूपच कमी प्रतिसाद मिळाला. काल दिवसभरात 12738 मुंबईकरांनी मेट्रोतून प्रवास केला.

मुंबई - वर्सोवा-अंधेरी-घाटकोपर मेट्रो 1 कालपासून वाहतूक सेवेत दाखल झाली आहे. काल पहिल्या दिवशी मेट्रोला खूपच कमी प्रतिसाद मिळाला. काल दिवसभरात 12738 मुंबईकरांनी मेट्रोतून प्रवास केला. तर आज सायंकाळी 6 वाजेपर्यंत 11808 प्रवाशांची नोंद झाली असून, आजच्या शेवटच्या फेरीपर्यंत हा आकडा 17 हजार च्या घरात जाईल, असा दावा मुंबई मेट्रो वन प्रायव्हेट लिमिटेड (एमएमओपीएल) ने केला आहे.

आज आकडा थोडा वाढला आहे, पण तो कमीच असल्याचे म्हटले जात आहे. कॊरोना-लोकडाऊनच्या पार्श्वभूमीवर सात महिने बंद असलेली मेट्रो 1 कालपासून सुरू झाली आहे. पण कोरोनाच्या काळात मेट्रो 1 ला म्हणावा तसा प्रतिसाद मिळालेला नाही. पहिल्या दिवशी सायंकाळी 5 वाजेपर्यंत 6727 जणांनी मेट्रोने प्रवास केला होता. तर सायंकाळी 6 वाजेपर्यंत हा आकडा 8049 पर्यंत पोहचला. रात्री साडेआठला सर्व फेऱ्या पूर्ण झाल्यानंतर अर्थात पहिल्या दिवशी 12738 जणांनी मेट्रो प्रवास केला.

लॉकडाऊन आधी याच मेट्रोमधून दिवसाला चार ते साडे चार लाख प्रवासी प्रवास करत होते. आता कॊरोनाचा काळ आहे, फेऱ्या कमी आहेत. प्रवासी क्षमता 50 टक्के करण्यात आली आहे, असे असले तरी 10 ते 15 हजार जणांनी मेट्रोने प्रवास करणे म्हणजे मुंबईकरांनी मेट्रोकडे पाठ फिरवली आहे का? असा प्रश्न निर्माण झाला आहे.

दरम्यान, आज दुसऱ्या दिवशीही मेट्रोला थंडच प्रतिसाद पाहायला मिळाला. एमएमओपीएलने दिलेल्या माहितीनुसार, आज सायंकाळी 6 वाजेपर्यंत 11808 जणांनी प्रवास केला आहे. काल सायंकाळी 6 वाजता हा आकडा 8049 वर होता. कालच्या तुलनेत आज आकडा किंचित वाढला आहे. पण महिन्याभरात परिस्थिती बदलेल आणि प्रतिसाद वाढेल, असा विश्वास एमएमओपीएलला आहे.