भोसरी जमीन घोटाळा प्रकरणी मंदाकिनी खडसेंना मुंबई उच्च न्यायालयाचा दिलासा

भोसरी जमीन घोटाळा प्रकरणात एकनाथ खडसे यांच्या पत्नी मंदाकिनी खडसे यांना दिलासा आहे. त्यांना तुर्तास अटक न करण्याचे निर्देश न्यायालयाने ईडीला दिले आहे.

मुंबई - पुण्यातील भोसरी भूखंड गैरव्यवहार प्रकरणात मुंबई उच्च न्यायालयाने राष्ट्रवादी काँग्रेसचे नेते एकनाथ खडसे यांच्या पत्नी मंदाकिनी खडसे यांना दिलासा दिला आहे. मंदाकिनी खडसे यांना तूर्तास अटक करू नये असे निर्देश ईडीला दिले आहेत. याकाळात दर मंगळवार आणि शुक्रवारी ईडी कार्यालयात हजेरी लावणे मंदाकिनी खडसेंना अनिवार्य केले आहे. तसेच पुढील सुनावणी पर्यंत ईडीला सहकार्य करण्याचे मंदाकिनी खडसे यांना न्यायालयाकडून सांगण्यात आले आहे

तपास यंत्रणेला सहकार्य करा -

पुण्यातील भोसरी भूखंड गैरव्यवहार प्रकरणात एकनाथ खडसे व त्यांच्या पत्नी मंदाकिनी खडसे यांची ईडीकडून चौकशी सुरु आहे. मंदाकिनी खडसे यांच्या विरोधात अटक वॉरंट काढण्यात आले असता त्यांनी त्या विरोधात मुंबईच्या सत्र न्यायालयात दाद मागितली होती. मात्र सत्र न्यायालयाकडून मंदाकिनी खडसे यांना दिलासा मिळाला नसल्याने त्यांनी उच्च न्यायालयात धाव घेतली होती. आज (गुरुवार) त्यावर सुनावणी झाली. मंदाकिनी खडसेंना मुंबई उच्च न्यायालयाने दिलासा दिला आहे. त्यांना तूर्तास अटक करू नये असे निर्देष न्यायालयाने ईडीला दिले आहेत. १७ ऑक्टोबर ते २९ नोव्हेंबरपर्यंत तपास यंत्रणेला सहकार्य करण्याचे न्यायालयाने मंदाकिनी खडसेंना निर्देश दिले असून याकाळात दर मंगळवारी आणि शुक्रवारी ईडी कार्यालयात हजेरी लावणे मंदाकिनी खडसेंना अनिवार्य केले आहे.

मंदाकिनी खडसे यांचा जामीन अर्ज फेटाळला -

पुणे जमीन घोटाळा प्रकरणात एकनाथ खडसेंची पत्नी मंदाकिनी आरोपी असून त्यांच्या विरोधात अजामीनपात्र वॉरंट काढण्यात आले होते. या वॉरंट विरोधात मंदाकिनी खडसे मुंबई सत्र न्यायालयात धाव घेतली होती आणि अटक पूर्व जामिन अर्ज दाखल केला गेला होता. मुंबई सत्र न्यायालयाने मंदाकिनी खडसे यांच्या अटकपूर्व जामीन अर्जावर सुनावणी झाली असता कोणताही दिलासा न देता अटकपूर्व जामीन अर्ज फेटाळून लावला होता. विशेष म्हणजे एकनाथ खडसेंची शस्त्रक्रिया झाली असून ते सध्या बॉम्बे हॉस्पिटलमध्ये आहेत. त्यांना बरे होण्यासाठी अजूनही काही दिवस लागणार आहे. यामुळे एकनाथ खडसे कोर्टात उपस्थित राहू शकणार नाही, याकरिता आम्हाला काही अवधी द्यावा अशी मागणी मंदाकिनी खडसे यांच्यावतीने सत्र न्यायालयाला केली होती. सत्र न्यायालयाने ही बाब लक्षात घेत, एकनाथ खडसे ह्याना न्यायालयात उपस्थित राहण्यासाठी वेळ दिला गेला आहे. मुंबई सत्र न्यायालयाने पुढील सुनावणी २१ ऑक्टोबरला ठेवली आहे.

काय आहे प्रकरण? -

एकनाथ खडसे यांच्या पत्नी मंदाकिनी खडसे आणि जावाई गिरीश चौधरी यांनी २८ एप्रिल २०१६ रोजी भोसरी एमआयडीसी येथील सव्‍‌र्हे क्र. ५२/२ अ ही जमीन अब्बास रसुलभाई उकानी नामक मूळ जमीन मालकाकडून ३.७५ कोटी रुपयांना खरेदी केली. नोंदणी निबंधकांच्या कार्यालयात या व्यवहाराची रीतसर नोंद केली. अशा प्रकारे एमआयडीसीच्या ताब्यात असलेल्या व त्यांच्या मालकीच्या जमिनीचे खडसे कुटुंबीय सरकारी कागदोपत्री मालक झालेले आहेत. या सर्व व्यवहारात सुमारे ६१ कोटी रुपयांच्या महसुलाचे नुकसान झाल्याचे सकृतदर्शनी दिसून येत आहे. हा मोठा गैरव्यवहार असल्याचा ‘ईडी’ला संशय आहे.

खडसेंवर बॉम्बे हॉस्पिटलमध्ये उपचार -

ईडीच्या रडारवर असलेले राष्ट्रवादी काँग्रेसचे ज्येष्ठ नेते एकनाथ खडसे यांची प्रकृती पुन्हा बिघडली असून बॉम्बे हॉस्पिटलमध्ये त्यांच्यावर शस्त्रक्रिया करण्यात येत आहे. न्यायालयात खडसेंच्या वकिलांनी यासंदर्भात आज माहिती दिली. दरम्यान, मूत्र मार्गाच्या संसर्गामुळे यापूर्वी खडसेंवर बॉम्बे हॉस्पिटलमध्ये उपचार करण्यात आले होते. गेल्या काही दिवसांपासून एकनाथ खडसे आणि त्यांचे कुटुंबीय ईडी चौकशीच्या फेऱ्यात अडकले आहेत. खडसे यांचे जावई गिरीश चौधरी यांना जुलै महिन्यात ईडीने ताब्यात घेतले. बेहिशेबी मालमत्ता प्रकरणात गिरीश चौधरी यांना अटक केली आहे. खडसे देखील ‘ईडी’च्या चौकशीला सामोरे जात आहेत. आज पुणे भोसरी येथील भूखंड प्रकरणी ईडीने राष्ट्रवादीचे नेते एकनाथ खडसे यांनी समन्स बजावले होते. न्यायालयात खडसे हजर राहणार होते. मात्र, खडसेंची प्रकृती अस्वस्थ असून त्यांच्यावर शस्त्रक्रिया होत आहे, त्यासाठी ते बॉम्बे हॉस्पिटलमध्ये दाखल करण्यात आली आहे.

हेही वाचा -रक्ताने अभिषेक करणाऱ्या भोंदू बाबाला अटक, भक्ताने केला भांडाफोड