वंचितांनाच प्रतिनिधीत्व देणार..! प्रकाश आंबेडकरांची 'ईटीव्ही भारत'ला मुलाखत

विधानसभा निवडणुकीची धामधुम सुरू आहे. सर्वच पक्षांचे शक्तीप्रदर्शन सुरू आहेत. याच पार्श्वभूमीवर वंचित बहुजन आघाडीचे नेते प्रकाश आंबेडकर यांची 'ईटीव्ही भारत'ने मुलाखत घेतली आहे.

मुंबई - विधानसभा निवडणुकीची धामधुम सुरू आहे. सर्वच पक्षांचे शक्तीप्रदर्शन सुरू आहेत. याच पार्श्वभूमीवर वंचित बहुजन आघाडीचे नेते प्रकाश आंबेडकर यांची 'ईटीव्ही भारत'ने मुलाखत घेतली आहे.

हेही वाचा - राजेंच्या पक्षप्रवेशाला पंतप्रधानांऐवजी कोण आले? धनंजय मुंडेंच्या 'या' प्रश्नाला जनतेने दिले असे उत्तर

प्रश्न : विधानसभा निवडणुकीत वंचित बहुजन आघाडी जनतेसामोर कोणता विकासासाठी अजेंडा ठेवणार आहेत?
उत्तर : आम्ही पाणी, नोकरी, पोलिसांचे प्रश्न, अंगणवाडी सेविका, आशा कामगार त्यानंतर कोतवाल, शेतकऱ्यांचे प्रश्न असे विविध प्रश्न घेऊन आम्ही या विधानसभेच्या निवडणुकीत उतरत आहोत. याच विषयावरचा आमचा जाहीरनामा बाहेर पडेल. आम्ही अपेक्षा ठेवून आहोत की, आमच्या या जाहीरनाम्यावर चर्चा होईल.

प्रश्न : राज्यात आपण काढत असलेल्या सत्तासंपादन रॅलीला मोठा प्रतिसाद मिळत आहे, याकडे आपण कसे पाहता?
उत्तर : राज्यातील लोकांना आता बदल हवा आहे. जनता तेच तेच बघून कंटाळली आहेत. त्यांना काहीतरी नवं पाहिजे आहे. त्यांना नवा कार्यक्रम पाहिजे आणि आम्ही वंचित बहुजन आघाडीच्या माध्यमातून या दोन्ही गोष्टी देत आहोत. आम्हाला चांगला प्रतिसाद लोकांकडून मिळतो आहे. आम्ही आज राज्यभरात जे विषय घेऊन जात आहोत तेच विषय सर्वपक्षीय लोकसुद्धा मांडत आहेत. त्यामुळे लोकांचा कल हा वंचित बहुजन आघाडीकडे वळताना दिसत आहे.

प्रश्न : एमआयएमसोबत आघाडी करण्यासाठी अजुनही आपले चित्र काही स्पष्ट होत नाही. त्यावर आपली भूमिका काय ठरणार आहे?
उत्तर : एमआयएम संदर्भात आम्ही आमची भूमिका मांडायची आहे. त्यामुळे आता त्यावर काही बोलू शकत नाही.

प्रश्न :आघाडीमध्ये जाण्याचा विषय काही पुढे मार्गी लागतो का?
उत्तर :आम्हाला जी आघाडी करायची आहे, ती आम्ही करू आणि तुमच्यासमोर त्याबद्दल माहिती जाहीर करू.

प्रश्न : राज्यातील मुस्लीम समाज आणि विशेषतः ओबीसी समाज तुमच्याकडे अपेक्षेने पाहत आहे, त्यावर काय सांगाल?
उत्तर :आम्ही राज्यातील लहान ओबीसींची यादी जाहीर करणार आहोत. यामध्ये मायक्रोस्कॉपी ओबीसींची यादी आम्ही पहिल्यांदा जाहीर करत आहोत.

प्रश्न :पहिल्या यादीतून आपण काही वेगळा संदेश देणार आहात ?
उत्तर: वेगळा मेसेज वगैरे काही नाही. परंतु वंचित घटकांपर्यंत अजूनही लोकशाही पोहोचलेली नाही. राजकीय पक्षांची उमेदवारी पोचलेली नाही. वंचित बहुजन आघाडी जो सत्तेपासून वंचित आहेत, शिक्षणापासून वंचित आहेत, आर्थिक व्यवस्थेपासून वंचित आहेत, त्यासोबतच सामाजिक प्रतिष्ठापासून वंचित आहेत. तसेच इतर सगळ्या गोष्टीमध्येही वंचित आहे. त्याला आम्ही प्रतिनिधीत्व देण्याचे जाहीर केलेले आहे.