Mumbai Corona Update : २३६६ नवे रुग्ण, २ रुग्णांचा मृत्यू

मुंबईत मे महिन्याच्या शेवटच्या आठवड्यापासून कोरोना विषाणूच्या रुग्णसंख्येत पुन्हा वाढ होऊ लागली आहे. रोज १७०० ते १९०० रुग्णांची नोंद होत आहे. काल बुधवारी २२९३ रुग्णांची नोंद झाली होती. आज गुरुवारी त्यात किंचित वाढ होऊन २३६६ रुग्णांची नोंद झाली आहे.

मुंबई - मुंबईत मे महिन्याच्या शेवटच्या आठवड्यापासून कोरोना विषाणूच्या रुग्णसंख्येत पुन्हा वाढ होऊ लागली आहे. रोज १७०० ते १९०० रुग्णांची नोंद होत आहे. काल बुधवारी २२९३ रुग्णांची नोंद झाली होती. आज गुरुवारी त्यात किंचित वाढ होऊन २३६६ रुग्णांची नोंद झाली आहे. मंगळवारी २ मृत्यूची नोंद झाली होती. आज पुन्हा २ मृत्यूची नोंद झाली आहे. आठवडाभरात तिसऱ्यांदा २ मृत्यूंची नोंद झाली आहे. मुंबईत सध्या ५३८ बेडवर रुग्ण आहेत. त्यापैकी ५७ रुग्ण ऑक्सिजनवर, १०४ रुग्ण आयसीयूमध्ये तर १० रुग्ण व्हेंटिलेटरवर असल्याची माहिती पालिकेच्या आरोग्य विभागाकडून देण्यात आली आहे.

१५.११ टक्के रुग्ण पॉजिटीव्ह -मुंबईत कोरोना रुग्णांचा शोध घेण्यासाठी पालिका आयुक्तांनी चाचण्या वाढवण्याचे आदेश दिले आहेत. त्यानुसार मुंबईत गेल्या २४ तासात १५ हजार ६५६ चाचण्या करण्यात आल्या. त्यात २३६६ नवे रुग्ण आढळून आले ( Mumbai Corona Update ) आहेत. चाचण्यांच्या प्रमाणात १५.११ टक्के रुग्ण पॉजिटीव्ह आढळून आले आहेत. आज २ मृत्यूची नोंद झाली आहे. १७०० रुग्णांना डिस्चार्ज देण्यात आला आहे. आतापर्यंत एकूण १० लाख ८८ हजार २४८ रुग्णांची नोंद झाली आहे. त्यापैकी १० लाख ५५ हजार ६६५ रुग्ण बरे झाले आहेत. तर १९ हजार ५७८ रुग्णांचा मृत्यू झाला आहे. सध्या १३ हजार ५ सक्रिय रुग्ण ( Active Corona Patients ) आहेत. रुग्ण बरे होण्याचे प्रमाण ९७ टक्के तर रुग्ण दुपटीचा कालावधी ४१९ दिवस इतका आहे. मुंबईत एकही इमारत झोपडपट्टी सील नाही. गेल्या आठवडाभरातातील कोरोना वाढीचा दर ०.१६३ टक्के इतका आहे.

वयोवृद्ध महिलेचा मृत्यू -मुंबईत आज कोरोनामुळे २ रुग्णाचा मृत्यू झाला आहे. मृत्यू झालेला एक व्यक्ती ८५ वर्षाचा असून त्याला मधुमेह व उच्च रक्तदाब हे आजार होते. दुसरा रुग्ण ४० वर्षाचा असून त्याला दीर्घकालीन आजार नव्हते अशी माहिती आरोग्य विभागाने दिली आहे.

१० रुग्ण व्हेंटिलेटरवर -मुंबईत आज आढळून आलेल्या २३६६ रुग्णांपैकी २२६१ म्हणजेच ९६ टक्के लक्षणे नसलेले रुग्ण आहेत. मुंबईत रुग्णालयांमध्ये २४ हजार ८५९ बेड्स असून त्यापैकी ५३८ बेडवर रुग्ण आहेत. त्यापैकी ५७ रुग्ण ऑक्सिजनवर, १०४ रुग्ण आयसीयूमध्ये तर १० रुग्ण व्हेंटिलेटरवर उपचार घेत आहेत.

रुग्णसंख्या वाढतेय -मुंबईत गेले दोन वर्षे कोरोनाचा प्रसार आहे. या दरम्यान कोरोनाच्या दोन लाटा आल्या. त्या दोन्ही लाटा थोपवण्यात पालिकेला यश आले आहे. पहिल्या लाटे दरम्यान २ हजार ८०० तर दुसऱ्या लाटेदरम्यान कोरोनाचे ११ हजार ५०० सर्वाधिक रुग्णांची नोंद झाली होती. डिसेंबर महिन्यात कोरोनाची तिसरी लाट आली असून ६ ते ८ जानेवारीदरम्यान सलग तीन दिवस २० हजाराच्यावर रुग्ण आढळून आले. त्यानंतर रुग्णसंख्येत घट झाली. मार्च एप्रिल महिन्यात रुग्णसंख्या ५० च्या खाली आली होती. मे महिन्यात रुग्णसंख्या १०० च्या वर गेली. मे महिन्याच्या अखेरीस ३१ मे ला ५०६, १ जून ला ७३९, २ जून ला ७०४, ३ जूनला ७६३, ४ जून ला ८८९, ५ जून ला ९६१, ६ जून ला ६७६, ७ जून ला १२४२, ८ जूनला १७६५, ९ जूनला १७०२, १० जूनला १९५६, ११ जूनला १७४५, १२ जूनला १८०३, १३ जूनला १११८, १४ जूनला १७२४, १५ जूनला २२९३, १६ जूनला २३६६ रुग्णांची नोंद झाली आहे.

१०६ वेळा शून्य मृत्यूची नोंद -मुंबईमध्ये १७ ऑक्टोबर २०२१ रोजी पहिल्यांदा शून्य मृत्यूची नोंद झाली. त्यानंतर आतापर्यंत एकूण १०६ वेळा शून्य मृत्यूची नोंद झाली आहे. फेब्रुवारी महिन्यात ८ वेळा तर मार्च महिन्यात २७ वेळा, एप्रिल महिन्यात २६ वेळा, मे महिन्यात २८ वेळा तर जून महिन्यात ७ वेळा शून्य मृत्यूची नोंद झाली आहे.