मुंबई - रेल्वे रूळ ओलांडणे, त्यावर खेळणे हे धोक्याचे असून रेल्वे कायद्यात तो गुन्हा आहे, अशी प्रतिक्रिया सामाजिक कार्यकर्ते आरटीआय सल्लागार अनिल गलगली यांनी दिली. लाईफ लाईन या लघु चित्रफितीचा प्रकाशन सोहळा नुकताच घाटकोपर पूर्व येथील शिवाजी तंत्रज्ञान विद्यालयात पार पडला. यावेळी प्रमुख पाहुणे म्हणून गलगली बोलत होते.
लाईफ लाईन या लघु चित्रफितीचा प्रकाशन सोहळा नुकताच घाटकोपर पूर्व येथील शिवाजी तंत्रज्ञान विद्यालयात पार पडला. या कार्यक्रमात अनिल गलगली यांच्या हस्ते 'लाईफ लाईन' या शॉर्टफिल्मचे लोकार्पण करण्यात आले. कार्यक्रमाचे प्रमुख पाहुणे अनिल गलगली पुढे म्हणाले की, या शॉर्टफिल्ममुळे समाज प्रबोधन होत अनेकांचे जीव वाचू शकणार आहेत. त्यामुळे याचा प्रचार करण्याचे आवाहनही त्यांनी केले.
देशभरात दरवर्षी रेल्वे अपघातामुळे मरणाऱ्यांचा आकडा लाखांच्या घरात असतो. मुंबईत रेल्वेच्या अपघातात अनेकांचे जीव जातात तसेच रोज अनेकांचे संसार उध्वस्त होत असतात. अनेकांना कायमचे अपंगत्व येते. म्हणूनच याकडे लक्ष वेधून फोकस या पत्रकारांच्या संघटनेच्या माध्यमातून आणि रेल्वे सुरक्षा बल घाटकोपर यांच्या सहकार्याने लाईफ लाईन या लघु चित्रफितीची निर्मिती करण्यात आली आहे. या फिल्ममुळे हार्बर, सेंट्रल आणि वेस्टर्न या तिन्ही लाईनच्या रेल्वे प्रवाशांमध्ये जनजागृती निर्माण करण्यासाठी सहाय्यक ठरणार असल्याची प्रतिक्रिया अनिल गलगली यांनी यावेळी दिली.
या सोहळ्याला सामाजिक कार्यकर्ते सागर बोरनारे, उल्हास अधाटे, प्रकाश वाणी, राधेश्याम शर्मा, जयदीप तन्ना, मनोज दुबे, आरपीएफ तर्फे छेदीलाल कानोजिया, ब्रिजेश कुमार बिनदवार, सिने कलावंत अविनाश कुंटे, कार्तिक ठक्कर आदी मान्यवर उपस्थित होते. दरम्यान, सर्व कलाकारांना संस्थेच्यावतीने उपस्थित मान्यवरांच्या हस्ते प्रमाण देण्यात आले.
