मुंबई- ज्ञानदेव वारे खाकी वर्दीतला देव माणूस. वारे पोलिस दलात नाईक पदावर कार्यरत आहेत. मात्र या माणसाने आत्तापर्यंत ५० हजारांपेक्षा जास्त बेवारस मृतदेहांवर अंत्यसंस्कार केले आहेत. कोरोना काळात मदतीला धावून येणाऱ्यांची संख्या कमी आहे. रुग्णालयात दाखल असलेल्या रुग्णांना भेटण्याची सुद्धा सोय नाही. अशावेळेस जर एखादा रुग्ण दगावला तर त्याच्या मृतदेहाची परवड होते. अंत्यसंस्काराला देखील घरचे उपस्थित राहू शकत नाही. अशा कठीण प्रसंगी वारे यांनी तब्बल ५० पेक्षा जास्त कोविड पॉझिटिव्ह रुग्णांवर आत्तापर्यंत अंत्यसंस्कार केले आहेत. या योद्ध्याचे कार्य शब्दात मांडण्याच्या पलिकडे आहे.
मृतकांवर धार्मिक विधी करत अंत्यसंस्कार
२००१ पासून वारे यांनी तब्बल 50 हजार मृतदेहांवर अंत्यसंस्कार केलेे आहेत. मृतक कोणत्या धर्माचा आहे. त्या धर्मानुसार त्यांनी मृतकांवर धार्मिक विधी करत अंत्यसंस्कार केले आहेत. कोरोनाच्या भयावह काळात देखील त्यांनी हे काम सुरुच ठेवले आहे. हे कार्य करताना वारे यांच्या अंगावर पीपीई कीटचा अभाव जाणवला.