मुंबई -शहराची लाईफ लाईन असलेल्या लोकलमधून रोज काही प्रवाशी गर्दीच्या रेट्यामुळे खाली पडून मृत्यूमुखी पडत असतात तर काही जखमी होतात. चेंबूर रेल्वे स्थानकातून बसलेल्या आई व मुलगी गर्दीच्या रेट्यामुळे लोकलमधून फलाटावर कोसळल्या.यानंतर कॅन्सरशी झुंज देणाऱ्या चार वर्षाच्या मुलीचा रुग्णालयात उपचारादरम्यान मृत्यू झाल्याची घटना गेल्या आठवड्यात चेंबूर स्टेशनवर घडली आहे. नेहा ढगे असे या मुलीचे नाव आहे.
मूळचे विदर्भातील नेहाचे कुटुंब मुंबईत रस्त्यावर रहात होते. नंतर एका एनजीओने त्यांची चेंबूर येथे व्यवस्था केली. ते चेंबूरवरुन मोनोरेलने परेलला यायचे. यादरम्यान 12 तासाच्या गॅपने नेहाला दोन इंजेक्शन घ्यावी लागायची. टयुमरच्या स्वरुपातील कॅन्सर नेहाच्या शरीराच्या अन्य भागांमध्ये पसरला असल्याचे डॉक्टरांनी सांगितले. तिला कॅमोथेरपी देण्यात आली होती. तिने ही थेरेपी चांगल्या प्रकारे सहन केली. त्यामुळे तिच्या तब्येतीत बदल होत होते. असे तिच्यावर उपचार करणाऱ्या डॉक्टरांनी सांगितले.
पैशाच्या चणचणीमुळे ते मोनो रेलने न जाता लोकल रेल्वेने जाण्यासाठी निघाले. यादरम्यान ती आईसोबत चेंबूर स्टेशनवर आली. तिची आई तिला घेऊन प्रवाशांनी खच्चून भरलेल्या ट्रेनमध्ये प्रवेश करण्याचा प्रयत्न करत असताना गर्दीच्या रेटयामुळे दोघीही प्लॅटफॉर्मवर कोसळल्या. फलाटावर कोसळल्या नंतर नेहाच्या तोंडातून आणि कानातून रक्तस्त्राव सुरु झाला. तिच्या हातांना आणि पायालाही मार लागला. तिच्या आईच्या डोळयांना मार लागला होता. रेल्वे पोलिसांनी लगेच दोघींना राजावाडी रुग्णालयात दाखल केले. नेहाची प्रकृती गंभीर असल्यामुळे तिला केईएम रुग्णालयात हलवले. आयसीयू कक्षामध्ये असताना ९ सप्टेंबरला नेहाचा मृत्यू झाला.