मुंबई : खार येथील नूतन विला इमारतीमधील घराला आग, एका महिलेचा मृत्यू

खार पश्चिममधील गुरू गंगेश्वर मार्ग येथील नूतन विला या इमारतीमधील एका घराला आग लागली आहे. घटनास्थळी रुग्णवाहिका, पोलीस, महापालिकेचे कर्मचारी दाखल झाले होते. आगीचा धूर इमारतीसह परिसरात पसरला होता. यात एका महिलेचा मृत्यू झाला आहे.

मुंबई - खार पश्चिम येथील नूतन वीला या इमारतीला गुरुवारी सायंकाळी साडेसातच्या सुमारास आग लागली. या आगीवर रात्री १०.२० च्या दरम्यान मुंबई अग्निशमन दलाने नियंत्रण मिळवले आहे. या आगीमधून अग्निशमन दलाच्या जवानांनी तीन महिलांना बाहेर काढले. त्यापैकी एका महिलेचा रुग्णालयात मृत्यू झाला आहे. तर इतर दोघींवर रुग्णालयात उपचार सुरू आहेत.

घराला आग

भाजपच्या स्थानिक नगरसेविका अलका केरकर यांनी दिलेल्या माहितीनुसार, खार पश्चिम, गुरू गणेश्वर मार्ग, सहावा रोड, प्लॉट क्रमांक २२९, नूतन वीला या आठ मजली इमारतीमधील सातव्या मजल्यावरील एका घरात गुरुवारी सायंकाळी साडेसातच्या सुमारास आग लागल्याची घटना घडली. ही संपूर्ण इमारत जगवानी कुटुंबियांची आहे. या आगीच्या वृत्ताने इमारत व परिसरात खळबळ उडाली. त्यामुळे रहिवाशांनी सुरक्षिततेच्या दृष्टीने इमारतीबाहेर धाव घेतली. मात्र, या आगीची माहिती मिळताच स्थानिक पोलीस, अग्निशमन दलाने तात्काळ घटनास्थळी धाव घेऊन बचावकार्य सुरू केले.

हेही वाचा -आश्चर्यम..! देवास येथील 90 वर्षीय आजी चालवते कार, गैजेट्सचीही आवड, पाहा व्हिडिओ...

एका महिलेचा मृत्यू

या आगीवर नियंत्रण मिळवताना अग्निशमन दलाच्या जवानांनी संगीता ठाकूर (४५), हेमा जगवानी (४०) आणि पलक जगवानी (१०) या तिघींना जखमी अवस्थेत बाहेर काढून त्यांना हिंदुजा रुग्णालयात उपचारासाठी तात्काळ दाखल करण्यात आले. मात्र, उपचार सुरू असताना हेमा जगवानी (४०) या महिलेचा मृत्यू झाला. संगीता ठाकूर व पलक जगवानी या दोघींची प्रकृती स्थिर आहे.

हेही वाचा -आगामी निवडणुकांसाठी वेळीच मिळणार जातवैधता प्रमाणपत्र : राज्य निवडणूक आयुक्त