मुंबई -आजपासून नवरात्री उत्सवला सुरुवात होत असून मुंबईमध्ये स्वर्गवासी प्रमोद महाजन क्रीडा संकुलावर दांडिया क्वीन फाल्गुनी पाठक यांचा दांडिया रंगणार आहे. करोनामुळे दोन वर्ष हा उत्सव पूर्णपणे बंद होता. परंतु, दोन वर्षानंतर नव तरुणाई सह असंख्य चाहते फाल्गुनी पाठक यांच्या गाण्यावर नाचण्यासाठी उस्तुक आहेत. फाल्गुनी पाठक यांनी नवरात्र उत्सवाच्या निमित्ताने प्रमोद महाजन क्रीडा संकुलात रंगीत तालीम केली. त्याप्रसंगी त्यांनी विविध गोष्टींवर बारकाईने लक्ष दिले. या रंगीत तालीम नंतर त्यांच्याशी खास बातचीत केली आहे, आमचे प्रतिनिधी संजय पिळणकर यांनी.
दोन वर्षांनी आयोजन होत आहे कसं बघता? -विशेष म्हणजे मागच्या दोन वर्षांपासून करोनामध्ये बऱ्याच लोकांना याचा फटका बसला आहे. परंतु, संगीत ही अशी एक जादू आहे का ते सर्वांमध्ये नवचैतन्य निर्माण करते. त्याचबरोबर नवरात्रीमध्ये नव देवींची गाणी गायल्याने एक नवीन स्फूर्ती भेटते व ही स्फूर्ती लोकांमध्ये जेव्हा जाते तेव्हा लोकांमध्ये नवचैतन्य निर्माण होते असे फाल्गुनी पाठक यांनी सांगितले आहे.