ED : इकबाल कासकरच्या निटकवर्तीय मुमताज शेखची 55 लाखांची संपत्ती ईडीने केली जप्त

सक्तवसुली संचालनालय ( ED ) इकबाल कासकरच्या निकटवर्तीय असणारा मुमताज एजाज शेख याचा ठाण्यातील 55 लाख रुपयांचा फ्लॅट जप्त केला आहे. ही कारवाई खंडणी प्रकरणात पीएमएलए, 2002 कायद्यान्वये ( PMLA Act ) करण्यात आली आहे.

मुंबई- अंडरवर्ल्ड डॉन दाऊद इब्राहीमचा ( Underworld don Dawood Ibrahim ) भाऊ इकबाल कासकर ( Iqbal Kaskar ) याच्या जवळच्या सहकारी मुमताज एजाज शेखच्या नावावरील ठाणे येथील 55 लाख रुपयाचा फ्लॅट अंमलबजावणी संचालनालयाने ( ED ) मंगळवारी (दि. 12 एप्रिल) जप्त केला आहे. इकबाल कासकरला फेब्रुवारी महिन्यात ईडीकडून मनी लॉन्ड्रिंग ( Money Laundering ) प्रकरणात अटक करण्यात आली होती. त्यावेळी इकबाल कासकरकडून ही माहिती मिळाल्यानंतर आज ईडीने मोठी कारवाई केली आहे. मनी लॉन्ड्रिंग प्रतिबंधक कायद्याखालील ( PMLA act ) प्रकरणाच्या तपासात आज ईडीने ही कारवाई केली. इकबाल कासकर तसेच त्याचे गुंड मुमताज, इसरार अली जमील सय्यद यांनी हा फ्लॅट शहरातील बिल्डर सुरेश मेहता यांच्याकडून खंडणी म्हणून बळकावला होता, असेही ईडीने स्पष्ट केले आहे.

या प्रकरणी कासारवडवली पोलिसांनी सप्टेंबर, 2017 मध्ये नोंदविलेल्या गुन्ह्याची ईडीने दखल घेतल्यावर मनी लॉन्ड्रिंग प्रतिबंधक आणि मकोका ( Mcoca act ) कायद्यानुसारही गुन्हा दाखल करण्यात आला. यामध्ये इकबाल कासकर, मुमताज शेख आणि इसरार अली जमील सय्यद यांच्याविरुद्ध भा.दं.वि.च्या विविध कलमांन्वये खंडणीसाठी नोंदवलेल्या गुन्ह्याच्यांच्या आधारे मनी लाँड्रिंगचा तपास सुरू केला.

ईडीच्या चौकशीत असे समोर आले की, फिर्यादी सुरेश देवीचंद मेहता एक रिअल इस्टेट बिल्डर आणि डेव्हलपर त्याच्या भागीदारासह त्याच्या फर्म मेसर्स दर्शन एंटरप्राइजेसद्वारे बांधकाम व्यवसाय चालवत होते. अंडरवर्ल्ड डॉन दाऊद इब्राहिमचा भाऊ आरोपी इकबाल कासकर, मुमताज शेख आणि इसरार अली जमील सय्यद यांनी ठाण्यातील एक फ्लॅट मुमताज एजाज शेख याच्या नावावर बळजबरीने करून घेतला होता. तसेच खंडणी स्वरूपात फ्लॅट व्यतिरिक्त त्याच्याकडून 40 लाख रुपयेही घेतले आहे. या प्रकरणी ईडीने आज ही संपत्ती जप्त केली आहे.

काय आहे प्रकरण -मेहता हे भागीदारांसह दर्शन एंटरप्रायझेसमार्फत बांधकाम व्यवसाय करीत होते. त्यांच्याकडून गुंडांनी एकूण दहा लाख रुपयांचे चार धनादेशही घेऊन ते वठवले होते. ज्या खात्यात हे धनादेश भरून पैसे काढण्यात आले, ती खाती नंतर केव्हाही वापरण्यात आली नाहीत. खंडणीखोरांची ओळख लपवण्यासाठी ही खाती वापरण्यात आली होती. त्याखेरीज त्यांनी मेहता यांच्याकडून फ्लॅटही बळावकावला होता.

हेही वाचा -INS Vikrant Case : किरीट सोमैया यांची अटकपूर्व जामिनासाठी मुंबई उच्च न्यायालयात धाव