मुंबई- शिक्षणाला वय नसते, हे महानगरपालिका कर्मचारी जगदीश नगरकर यांनी दाखवून दिले आहे. स्मशानभूमीत मृत्यू नोंदणी कारकून म्हणून काम करत त्यांनी वयाच्या 49 व्या वर्षी पदवी मिळवली आहे. जिद्दीच्या जोरावर त्यांनी एलएलबी संपादन करण्याचा मान मिळवला आहे. अमाप कष्ट, लहानपणीच वडिलांचे हरवलेले छत्र, झोपडपट्टीत आयुष्य घालवणं या परिस्थितीत देखील त्यांची शिक्षणाची आवड कायम राहिली आहे. यामुळेच ते यशाच्या शिखरापर्यंत पोहोचल्याचे सांगतात.
शानभूमीत मृत्यू नोंदणी कारकून म्हणून काम करत वयाच्या 49 व्या वर्षी एलएलबी पदवी संपादन केली आहे. 1989 साली नगरकर पालिकेत हंगामी पद्धतीवर कामाला लागले. यानंतर त्यांची चतुर्थी श्रेणी कामगारांमध्ये निवड झाली. कुटुंबाचे ओझे अंगावर असतानाही त्यांनी वाणिज्य शाखेतून 2005 साली पदवी संपादन केली. यानंतर 2014 साली त्यांनी विधी शाखेत प्रवेश घेतला. त्यावेळी ते भोईवाडा स्मशानभूमीत काम करत होते. या स्मशानभूमीत त्यांनी पुन्हा अभ्यासाला सुरुवात केली. अभ्यासाला पोषक असणारी शांतता स्मशानभूमी व्यतिरिक्त कुठेच मिळत नसल्याचे ते सांगतात.
2019 साली त्यांनी विधी शाखेत पदवी मिळवली व पालिकेच्या विधी शाखेत बदली मिळण्यासाठी अर्ज केला. हा अर्ज मान्य करत त्यांना नोटीस कारकून या पदावर घेण्यात आले. पुढे आणकी शिकायचं असून चतुर्थश्रेणी कामगारांना देखील शिकवायचे असल्याचे नगरकर यांनी सांगितले आहे. बाबासाहेबांनी सांगितलेल्या मार्गावर मी चाललो; आणि इथपर्यंत पोहचलो, असे ते म्हणाले. बाबासाहेबांनी दिलेल्या शिक्षणाच्या मंत्राने हे शिक्षण पूर्ण केल्याचे त्यांनी सांगितले. तसेच पुढे आणखी शिकण्याची इच्छा त्यांनी व्यक्त केली आहे.
