मुंबई- लोकसभेत पुन्हा एकदा जनतेने भाजपला कौल दिला आहे. आता विधानसभेची तयारी सुरू आहे. गेल्या पाच वर्षात भाजप सरकारने अनेक विकास कामे केली आहेत, ती कामे जनतेसमोर घेऊन जाणार असल्याचे भाजपचे ज्येष्ठ नेते आणि अर्थमंत्री सुधीर मुनगंटीवार यांनी म्हटले आहे. लोकसभा आढावा बैठकीनंतर ते पत्रकारांशी बोलत होते.
जनतेने पंतप्रधान नरेंद्र मोदी यांना पुन्हा एकदा आनंदाने संधी दिली आहे. त्यांनी केलेल्या अनेक कामांची ती पावती आहे. राज्यातही अनेक कामे झाली आहेत. शेतकऱ्यांना आतापर्यंत 20 हजार कोटींची रक्कम कर्जमुक्तीसाठी देण्यात आली आहे. तर 4 हजार कोटी रुपयांची रक्कम देण्यात येणार आहे. शेवटच्या पात्र लाभार्थ्यांपर्यंत कर्जमुक्ती योजना सुरूच राहील असेही त्यांनी सांगितले. अशीच लोकाभिमुख कामे जनतेच्या समोर घेऊन जाणार आहोत. मात्र, त्याचा कार्यक्रम निश्चित झाला नसल्याचे त्यांनी सांगितले.