मुंबई - मुंबईकरांची लाईफलाइन असलेल्या बेस्टने प्रवाशांना चांगली सेवा देण्यासाठी भाडेतत्वावर बसेस घेतल्या आहेत. कंत्राटदार कंपनीने ( Contractor Company Mumbai ) वेळेवर पगार न दिल्याने आज (गुरुवारी) सकाळी या बसच्या चालकांनी काम बंद ( BEST Bus drivers strike ) आंदोलन केले आहे. यामुळे बेस्ट सेवेवर परिणाम होऊन प्रवाशांना त्रास सहन करावा लागला. याबाबत कंत्रादारावर कारवाई करण्यात येईल, असे बेस्ट प्रशासनाकडून सांगण्यात आले आहे.
खासगी बस चालकांचे काम बंद आंदोलन :बेस्ट उपक्रम आर्थिक अडचणीत आहे. बेस्टला आर्थिक अडचणीतून बाहेर काढण्यासाठी खासगी बसेस चालवण्याचा सल्ला पालिका आयुक्तांनी दिला होता. त्यानुसार बेस्टच्या ताफ्यात मिडी, मिनी, एसी बसेस भाडेतत्वावर घेण्यात आल्या आहेत. या बसेस चालवण्याच्या बदल्यात कंत्राटदार कंपनीला प्रति किलोमीटर पैसे दिले जात आहेत. यामधून कंत्राटदाराला चालकाचा (ड्रायव्हर) पगार, सीएनजी गॅस, बसचे मेंटनंस करावे लागते. मात्र कंत्राटदाराने आपल्या चालकांना गेले पाच ते सहा महिने दिलेला नाही. याकारणाने आज सकाळी अचानक खासगी बस चालकांनी एकही बस रस्त्यावर काढली नाही. यामुळे प्रवाशांचे मोठ्या प्रमाणात हाल झाले. अनेकांना खासगी टॅक्सी, रिक्षा, ओला, ओबेर आदी वाहनांनी रेल्वे स्टेशन तसेच आपले कार्यालय गाठावे लागले.