चिंताजनक..! कल्याण डोंबिवलीत एका दिवसात वाढले 560 कोरोनाबाधित रुग्ण

गुरुवारी कल्याण डोंबिवली महापालिका क्षेत्रात 560 कोरोनाबाधित रुग्ण वाढले आहेत. यामुळे कोरोनाबाधित रुग्णसंख्या 7 हजार 485 वर पोहोचली आहे. आतापर्यंत 3 हजार 90 जण कोरोनामुक्त झाले आहेत. 4 हजार 268 रुग्णांवर विविध रुग्णालयांमध्ये उपचार सुरु आहेत तर मृतांची संख्या 127 वर पोहोचली आहे.

ठाणे- कल्याण डोंबिवली महानगरपालिका क्षेत्रात दिवसागणिक कोरोनाबाधित रुग्णांची संख्या मोठ्या प्रमाणत वाढत आहे. गुरुवारी एकाच दिवशी 560 रुग्ण आढळून आल्याने शहरात भीतीचे वातावरण पाहवयास मिळाले आहे. महापालिका क्षेत्रात कोरोनाचा कहर सुरू असून बुधवारी 350 रुग्णांनंतर गुरुवारी 560 नवे रुग्ण सापडले. चार रुग्ण दगावल्याने मृतांची संख्या 127 वर पोहोचली आहे.

कल्याण-डोंबिवली महापालिका क्षेत्रातील एकूण रुग्णसंख्या 7 हजार 485 वर पोहोचली आहे. कोरोना रुग्णांची संख्या मोठ्या प्रमाणात चाळ आणि झोपडपट्ट्यांसह उच्चभ्रू सोसायट्यांमध्ये वाढल्याचे दिसून आले. मागील 21 दिवसांमध्ये कल्याण डोंबिवलीत सलग 13 दिवस कोरोनाच्या रुग्ण संख्या वाढीने 200 चा आकडा पार केला. वाढणाऱ्या रुग्ण संख्येने काही दिवस सतत तीनशेचा आकडा पार केला होता. मात्र,शनिवार पासून कोरोनाबाधित रुग्णांची संख्या चारशेने वाढत होती. गुरुवारी रुग्णांच्या आकडेवारीने साडेपाचशेचा टप्पा पार केला. आतापर्यंत 127 जणांचा मृत्यू झाला असून 3 हजार 90 जणांना डिस्चार्ज देण्यात आला आहे. तर तब्बल 4 हजार 268 रुग्ण विविध रुग्णालयात उपचार घेत आहेत.

गुरुवारी आढळून आलेल्या 560 रुग्णांपैकी 4 जणांचा मृत्यू झाला आहे. आजपर्यंत महापालिका हद्दीत एकूण रुग्णसंख्या 7 हजार 485 वर पोहोचली आहे. लॉकडाऊनमध्ये शिथिलता देण्यात आल्यानंतर कोरोना संसर्गात झपाट्याने वाढ झाली आहे. गेल्या आठ दिवसांमध्ये कोरोनाबाधितांच्या आकडेवारीत मोठ्या प्रमाणात वाढ झाल्याने आरोग्य विभागासह संबंधित यंत्रणाही हतबल झाल्याचे दिसून आले आहे. सरकारी रुग्णालयासह खासगी रुग्णायलही रुग्णांनी हाऊसफुल झाली आहेत.

दरम्यान, गुरुवारी आढळून आलेल्या रुग्णांमध्ये डोंबिवली पूर्व परिसरात 156 रुग्ण, कल्याण पूर्वेत 164, कल्याण पश्चिममध्ये 131, डोंबिवली पश्चिमेत 78 आणि टिटवाळा - मांडा परिसरात 31 जणांचा समावेश आहे. एकाच दिवशी 560 रुग्णांची विक्रमी नोंद झाल्याने शहरातील कोरोना संसर्ग परिस्थिती प्रशासनाच्या हाताबाहेर गेल्याचे दिसून आले.