नवी दिल्ली - कोरोनाच्या संकटात अर्थव्यवस्थेच्या आघाडीवर चिंताजनक बातमी आहे. कोरोनाच्या प्रसाराला आटोक्यात आणण्यासाठी सुरू असलेल्या टाळेबंदीचा अर्थव्यवस्थेला मोठा फटका बसत आहे. बँक गुंतवणूक आणि वित्तीय सेवा देणाऱ्या गोल्डमॅन सॅच्सच्या अंदाजानुसार भारताला आजपर्यंतच्या सर्वात मोठ्या मंदीचा सामना करावा लागणार आहे.
गोल्डमॅन सॅच्सच्या अंदाजानुसार देशाचा जीडीपी चालू आर्थिक वर्षाच्या दुसऱ्या तिमाहीत ४५ टक्क्यांनी घसरणार आहे. यापूर्वी 'गोल्डमॅन'ने जीडीपीत २० टक्के घसरण होईल, असा अंदाज केला होता. असे असले तरी तिसऱ्या तिमाहीत २० टक्के सुधारणा होईल, असा अंदाज आहे. चौथ्या तिमाहीत १४ टक्के सुधारणा तर पुढील वर्षाच्या पहिल्या तिमाहीत ६.५ टक्के सुधारणा होईल, असा अंदाज केला आहे.