वडिलांचे निधन होऊनही कर्तव्य तत्परता, कर्मचाऱ्याचे वित्त मंत्रालयाने केले कौतुक

वित्त मंत्रालयाने ट्विटमध्ये म्हटले आहे की, कुलदीप यांच्याजवळ अर्थसंकल्प तयार करण्याचा ३१ वर्षांचा अनुभव आहे. निर्धारित वेळेत अर्थसंकल्प छपाई करण्यासाठी ते महत्त्वाची भूमिका बजावतात.

नवी दिल्ली - अर्थसंकल्प सादर होण्यापूर्वी वित्त मंत्रालयाने ट्विट करत एका कर्मचाऱ्याचे कौतुक केले आहे. वित्त मंत्रालयाच्या छपाई विभागाचे उपव्यवस्थापक असलेल्या कुलदीप शर्मा यांच्या वडिलांचे २६ जानेवारीला निधन झाले. त्यांच्यावर अर्थसंकल्पासाठी जबाबदारी देण्यात आली होती. अशा स्थितीत कुलदीप यांनी कर्तव्याला प्राधान्य देत छपाई परिसर न सोडण्याचा निर्णय घेतला.

वित्त मंत्रालयाने ट्विटमध्ये म्हटले आहे, की कुलदीप यांच्याजवळ अर्थसंकल्प तयार करण्याचा ३१ वर्षांचा अनुभव आहे. निर्धारित वेळेत अर्थसंकल्प छपाई करण्यासाठी ते महत्त्वाची भूमिका बजावतात.

अर्थसंकल्प हा गोपनीय ठेवण्यासाठी संबंधित अधिकारी व कर्मचाऱ्यांना हलवा समारंभ झाल्यानंतर नॉर्थ ब्लॉकमध्ये ठेवण्यात येते. यावेळी त्यांना नातेवाईकांना बोलण्याची परवानगी नसते. तसेच कोणालाही त्यांनी अर्थसंकल्प सादर करण्यापूर्वी भेटण्याची परवानगी नसते. अर्थसंकल्प गोपनीय राहण्यासाठी त्याची छपाईदेखील नॉर्थ ब्लॉकमध्ये करण्यात येते.

दरम्यान, केंद्रीय अर्थमंत्री निर्मला सीतारामन १ फेब्रुवारीला अर्थसंकल्प सादर करणार आहेत.