'लक्ष्यभेदी कारवाईत इराणच्या जनरल सुलेमानीची हत्या बेकायदेशीर'

अमेरिकेने आत्तापर्यंत सादर केलेल्या पुराव्यातून जनरल सुलेमानी आणि त्यांच्या सहकाऱ्यांची हत्या मनमानी पद्धतीने झाल्याचे दिसून येते. 3 जानेवारीला झालेल्या या घटनेबाबत अमेरिकेने संयुक्त राष्ट्राच्या करारांचेही उल्लंघन केले आहे. अमेरिकेकडे पर्याप्त पुरावे नसतानाही त्यांनी ही कारवाई केल्याचे अहवालात म्हटले आहे.

जिनिव्हा -अमेरिकेने लक्ष्यभेदी कारवाईत इराणचे लष्करी अधिकारी जनरल कासिम सुलेमानी यांची केलेली हत्या बेकायदेशीर असल्याचे संयुक्त राष्ट्राच्या अहवालात म्हटले आहे. या हत्येसाठी अमेरिकेकडे पर्याप्त पुरावे नसल्याचेही अहवालात नमूद करण्यात आले आहे. इराणच्या कुड्स फोर्सचे प्रमुख जनरल सुलेमानीला इराकमधील बगदाद विमानतळाजवळ अमेरिकेने ड्रोनद्वारे लक्ष्यभेदी कारवाईत ठार मारले. ही कारवाई यावर्षी 3 जानेवारीला करण्यात आली होती.

संयुक्त राष्ट्रातील विशेष प्रतिनिधी अ‍ॅग्नेस कॉलमार्ड यांनी संयुक्त राष्ट्र मानवी हक्क परिषदेला ड्रोन तंत्रज्ञानाचा वापर करुन केलेल्या कारवाईसंबंधी अहवाल सादर केला. अ‍ॅग्नेस कॉलमार्ड या न्यायव्यवस्थेच्या बाहेर झालेल्या हत्यांसदर्भात (एक्स्ट्राजुडिशिअल किलिंग) चौकशी करणासाठी नेमलेल्या विशेष प्रतिनिधी आहेत. अमेरिकेने मनमानी पद्धतीने सुलेमानी यांची हत्या केल्याचे त्यांनी अहवालात म्हटले आहे.

अमेरिकेने आत्तापर्यंत सादर केलेल्या पुराव्यातून जनरल सुलेमानी आणि त्यांच्या सहकाऱ्यांची हत्या मनमानी पद्धतीने झाल्याचे दिसून येते. 3 जानेवारीला झालेल्या या घटनेबाबत अमेरिकेने संयुक्त राष्ट्राच्या करारांचेही उल्लंघन केले आहे. अमेरिकेकडे पर्याप्त पुरावे नसतानाही त्यांनी ही कारवाई केली, असे अहवालात म्हटले आहे.

अमेरिकेचे हितसंबंध ज्या ठिकाणी आहेत, त्या ठिकाणांवर जनरल सुलेमानी हल्ला करण्याच्या तयारीत होते, याचा एकही पुरावा अमेरिकेने दिला नाही. विशेषता इराकसंबंधी एकही पुरावा दिला नाही. त्यामुळे या कारवाईचे समर्थन करता येईल, असे सिद्ध होत नाही, असे या अहवालात म्हटले आहे.