मायावती केस काळे करून स्वतःला तरुण दाखवतात; भाजप नेत्याचे आक्षेपार्ह विधान

या ट्विटवरून सुरेंद्र नारायण यांना पत्रकारांनी प्रश्न विचारला होता. त्यावेळी उत्तर देताना मायावतींवर अगदी खालच्या शब्दात त्यांनी वक्तव्य केले.

लखनौ -बसप अध्यक्ष मायावती केस काळे करून स्वतःला तरुण दाखवण्याचा प्रयत्न करतात, असे आक्षेपार्ह विधान भाजपचे आमदार सुरेद्र नारायण सिंह यांनी केले आहे. लोकसभा निवडणुकांच्या पार्श्वभूमीवर त्यांच्या या विधानाने राजकीय वादंग पेटण्याची शक्यता आहे. पक्ष कार्यालयात पत्रकारांनी विचारलेल्या प्रश्नांना उत्तर देतांना त्यांनी हे विधान केले.

मायावती यांनी आपल्या ट्विटर अकाऊंटवरून पंतप्रधान मोदी यांच्या राहणीमाणावर टीका केली होती. नरेंद्र मोदी हे साधे जीवन आणि उच्च विचारांच्या विरोधाभासी म्हणजेच शाही अंदाजात जगतात. मागच्या निवडणुकांमध्ये मतदान मिळवण्यासाठी त्यांनी स्वतःला 'चायवाला' म्हणून प्रचारीत केले होते. त्यानंतर यावेळी मोठी तयारी आणि शान सहीत स्वतःला चौकीदार म्हणून घोषित केले आहे. देश खरच बदलत आहे का? असा तो मायावतींचा ट्विट होता.

या ट्विटवरून सुरेंद्र नारायण यांना पत्रकारांनी प्रश्न विचारला होता. त्यावेळी उत्तर देताना मायावतींवर अगदी खालच्या शब्दात त्यांनी वक्तव्य केले. मायावतींचे केस पांढरे झाले आहेत. तरी त्या केसांना काळा रंग देऊन स्वतःला तरुण दाखवण्याचा प्रयत्न करतात. केस पांढरे असताना स्वतःला तरुण दाखवणे याला बनावटी 'शौक' म्हणतात, असेही ते म्हणाले. एवढेच नव्हे तर मायावती रोज चेहऱ्याची फेशीअल करतात, असेही सुरेंद्र नारायण म्हणाले.

कोण आहेत सुरेंद्र नारायण -

सुरेंद्र नारायण हे उत्तर प्रदेशच्या बलिया विधानसभा मतदार संघातून आमदार आहेत. नेहमी आक्षेपार्ह भाषेत वक्तव्य केल्यावरुन ते चर्चेत असतात. मागच्या वर्षी त्यांनी भगवान रामही धर्तीवर आले तरी बलात्काराच्या घटना थांबवू शकरणार नाही, असे वक्तव्य केले होते.