क्रांती (प. बंगाल) : पश्चिम बंगालच्या मुख्यमंत्री ममता बॅनर्जी यांच्या हेलिकॉप्टरने मंगळवारी खराब हवामानामुळे जलपाईगुडी येथील एअरबेसवर आपत्कालीन लँडिंग केले. मात्र लँडिंग दरम्यान हेलिकॉप्टर डळमळू लागले. त्यावेळी हेलिकॉप्टरमधून उतरताना ममता बॅनर्जींच्या पाठीला आणि पायाला दुखापत झाली. त्यानंतर त्या कोलकात्यात परतल्या आणि थेट एसएसकेएम रुग्णालयात दाखल झाल्या.
ममता घरूनच उपचार घेतील : संध्याकाळी 5.15 वाजता ममता बॅनर्जी एसएसकेएम रुग्णालयात दाखल झाल्या. त्यावेळी त्यांना चालताना अडचण येत होती. 2021 च्या निवडणुकीदरम्यान झालेल्या अपघातामुळे त्यांच्या पायाला दुखापत झाली होती. रुग्णालयातील सूत्रांनी दिलेल्या माहितीनुसार, त्यांच्या डाव्या गुडघ्याच्या लिगामेंटमध्ये दुखापत झाली आहे. त्यामुळे त्यांना सध्या रुग्णालयातच राहण्याचा सल्ला देण्यात आला आहे. मात्र ममता बॅनर्जींना रुग्णालयात राहण्याची इच्छा नसल्याची माहिती आहे. त्या सर्व उपचार घरूनच करतील. एसएसकेएम रुग्णालयाचे संचालक मोनिमोय बॅनर्जी यांनी पत्रकार परिषद घेऊन ही माहिती दिली. मुख्यमंत्र्यांना पुरेशा विश्रांतीची गरज असल्याचेही डॉक्टरांनी सांगितले. ममता बॅनर्जी यांना किमान आठवडाभर विश्रांतीचा सल्ला देण्यात आला आहे.