चुंबन ही एक कला आहे. ती एक उत्स्फूर्त प्रेमाची अनुभूती आहे. फ्लाईंग किस पासून फ्रेंच किस पर्यंत चुंबनाचे अनेक प्रकारही आहेत. पण तुम्हाला माहीत आहे का, की चुंबनाचेही एक शास्त्र आहे. हो तुम्ही अगदी बरोबर वाचलंत... चुंबनाचे एक शास्त्रही आहे. चुंबन दिन व्हॅलेंटाईन वीकच्या भाषेत 'किस डे' च्या निमित्ताने तुम्हाला फ्रेंच किस कसा घ्यायचा याची माहिती आम्ही देणार आहोत. तुम्ही फर्स्ट टाईम किस घेणार असाल किंवा अगदी निष्णात चुंबन घेणारे असाल. तरी ही माहिती वाचल्यावर तुमच्या चुंबनाचा आनंद नक्कीच द्विगुणीत होईल यात शंकाच नाही.
चुंबन घ्यायचे म्हटल्यावर त्यासाठी थोडी पूर्वतयारी करावी लागते बरं का... त्याचं काय आहे. गूज ओठांनी ओठांना सांगायचं म्हटल्यावर तुमचे ओठ मृदू मुलायम असायला पाहिजेत. त्यासाठी पाणी भरपूर प्या, ओठ मऊ राखण्यासाठी साय, तूप किंवा इतर बाजारात मिळणाऱ्या सौंदर्य प्रसाधन साधनांचा आवर्जुन वापर करा. त्यामुळे तुमचे ओठ ताजेतवाने राहतील. मुखदुर्गंधी येणार नाही, याचीही काळजी घ्या. त्यासाठी ब्रश करा, लसूण-कांदा खाण्यापासून किस करण्यापूर्वी दूर राहा. एकूणच या सगळ्या गोष्टींच्यामुळे तुमचा किसचा खरा आनंद मिळेल.
काही गोष्टींमध्ये अजिबात धसमुसळेपणा करुन चालत नाही. किसचेही असेच आहे. 'स्ट्राईक द राईट कॉर्ड, राईट टाईम' हा वाक्प्रचार तुम्हाला माहीतच असेल. चुंबनाचेही तसेच आहे. नेमका क्षण गाठून किस घेतला तर त्याची मजा काही औरच असते. फ्रेंच किससाठी एकांत खूपच महत्वाचा. कारण हे दीर्घ चुंबन असल्याने, कोणताही डिस्टर्ब नसणारा एकांत यासाठी महत्वाचा असतो. त्यामुळे कबाब में हड्डी कुणीही येणार नाही याची काळजी घ्या.