नवी दिल्ली - राजधानी दिल्लीच्या सीमेवर सुरू असलेल्या शेतकरी आंदोलनाचा आज ३१ वा दिवस आहे. तब्बल एक महिन्यानंतरही आंदोलनावर तोडगा निघाला नाही. सरकारने शेतकऱ्यांपुढे चर्चेचा नवा प्रस्ताव पाठवला आहे. त्यावर विचारविनिमय करण्यासाठी सुमारे ४० शेतकरी संघटनांची दिल्लीत बैठक होत आहे. सिंघू आणि टीकरी सीमेवर शेतकरी सर्व लवाजम्यासह बस्तान मांडून बसले आहेत. त्यासोबतच हरयाणा, पंजाब, उत्तरप्रदेशातही विविध ठिकाणी आंदोलन सुरू आहे.
आधी कायदे रद्द करा, मगच चर्चा -
तिन्ही कायदे आधी रद्द करा त्यानंतरच आम्ही सरकारसोबत चर्चा करू अशी भूमिका शेतकरी संघटनांनी घेतली आहे. मात्र, कायदे रद्द होणार नसून शेतकऱ्यांच्या सर्व शंका दूर केल्या जातील, असे आश्वासन कृषी मंत्री नरेंद्र सिंह तोमर यांनी शेतकऱ्यांना दिले आहे. किमान आधारभूत किंमत, खासगी बाजार समित्या, कंत्राटी शेती याबाबत शेतकऱ्यांनी प्रश्न उपस्थित केले आहेत.