झोमॅटो पुन्हा वादात, डिलिव्हरी बॉईजनीच कंपनीविरोधात छेडले आंदोलन

पश्चिम बंगालमध्ये झोमॅटोविरोधात त्यांच्या डिलिव्हरी बॉइजनीच आठवडाभरापासून आंदोलन छेडले आहे.

कोलकाता - ग्राहकांना ऑनलाईन अन्नपदार्थ घरी पोहोचविण्याची सेवा देणारी झोमॅटो नेहमीच चर्चेत असते. आता पश्चिम बंगालमध्ये झोमॅटोविरोधात त्यांच्या डिलिव्हरी बॉईजनीच आठवडाभरापासून आंदोलन छेडले आहे.

पश्चिम बंगालमध्ये बीफ आणि डुकराचे मटणाची डिलिव्हरी करण्यास डिलिव्हरी बॉयनी नकार दिला आहे. कंपनी आमचे ऐकत नसून धर्माविरुद्दच्या गोष्टी करायला सांगत आहे. त्यामुळे आमच्या भावना दुखवल्या जात असल्याचं डिलिव्हरी बॉईजनी म्हटले आहे. कंपनीने कर्मचाऱ्यांच्या धार्मिक भावनांशी खेळू नये. याचबरोबर पगारवाढ करावी, अशी मागणी आंदोलनकर्त्या डिलिव्हरी बॉईजनी केली आहे.

गेल्या महिन्यात 31 जुलैला डिलिव्हरी बॉय हिंदू नसल्यानं ऑर्डर रद्द करणाऱ्या ग्राहकाला झोमॅटोनं कौतुकास्पद उत्तर दिले होते. 'अन्नाला धर्म नसतो, अन्न हाच धर्म असतो', असे उत्तर झोमॅटोनं म्हटले होते.

आम्हाला भारताच्या कल्पनेचा अभिमान आहे. आमच्या ग्राहकांच्या आणि भागिदारांच्या विविधतेचा आम्हाला अभिमान आहे. आम्ही व्यवसाय करताना मूल्यं पाळतो. त्यामुळे आमच्या मूल्यांच्या आड येणारा व्यवसाय गमावल्याबद्दल आम्हाला दु:ख वाटत नाही,' असे झोमॅटोचे संस्थापक दिपिंदर गोयल यांनी ट्विट करत म्हटले होते.