भोपाळ - भाजप अध्यक्ष अमित शाह हे हत्या प्रकरणातील आरोपी आहेत आणि त्यांचे पुत्र जय शाह जादुगार आहेत, असा टोला राहुल गांधी यांनी मारला. ते मध्यप्रदेशच्या जबलपूर येथे एका सभेला संबोधित करत होते. दरम्यान त्यांनी भाजपला फैलावर घेतले. त्यांच्या या वक्तव्यामुळे मात्र राजकीय वातावरण तापण्याची शक्यता आहे.
लोकसभा निवडणुकांच्या तिसऱ्या टप्प्यातील मतदान प्रक्रिया आटोपल्यानंतर आता देश चौथ्या टप्प्याच्या दिशेने पाऊल टाकत आहे. त्या पार्श्वभूमीवर आज राहुल गांधी हे मध्यप्रदेशात प्रचार करत होते. दरम्यान त्यांनी भाजपवर घणाघात केला. अमित शाह हे खुन प्रकरणातील आरोपी आहेत, असा टोला त्यांनी यावेळी मारला. तर, त्यांचा पुत्र जादुगार आहे केवळ तीनच महिन्यात त्याने ८० कोटी रुपयांचे ५० हजार कोटी रुपयात रुपांतर केले, असा आरोपही लावला.