भोपाळ - मध्यप्रदेशातील उज्जैन येथे बारा ज्योतिर्लिंगापैकी एक ज्योतिर्लिंग आहे. आज हिंदी भाषिक लोकांचा चौथा श्रावणी सोमवार असल्याने उज्जैन महाकाल मंदिरात रविवारी मध्यरात्रीपासूनच भक्तांची दर्शनासाठी रांग लागली आहे.
भक्तांनी सोमवारी रात्री १ वाजतापासून भस्म आरतीसाठी रांग लावली होती. त्यानंतर रात्री अडीच वाजताच्या सुमारास ढोल-ताशाच्या गजरात भस्म आरतीला सुरुवात झाली. यावेळी दूध, दही, तूपाने भगवान महाकालचा अभिषेक करण्यात आला. यावेळी मंत्री जयवर्धन सिंह देखील उपस्थित होते. त्यानंतर भाविक-भक्तांसाठी दर्शनासाठी मंदिर सुरू करण्यात आले. श्रावण महिन्यात व्रत-वैकल्य केल्याने भगवान प्रसन्न होतात. तसेच भक्तांच्या प्रत्येक इच्छा पूर्ण होतात, अशी भाविक-भक्तांची श्रद्धा आहे. त्यामुळे लाखोच्या संख्यने भाविक-भक्त महाकाल मंदिरात येऊन पूजा-अर्चा करीत असतात.
