मी विकाऊ नाही, निष्पक्ष चौकशी करा, मुलाच्या अपघातानंतर खासदार रुपा गांगुलींचे ट्विट

पश्चिम बंगालच्या भाजप खासदार रुपा गांगुली यांच्या मुलाला पोलिसांनी अपघाताप्रकरणी ताब्यात घेतले आहे. अपघातानंतर भाजप खासदार रुपा गांगुली यांनी एक ट्विट केले आहे.

कोलकाता- पश्चिम बंगालच्या भाजप खासदार रुपा गांगुली यांच्या मुलाला पोलिसांनी अपघाताप्रकरणी ताब्यात घेतले आहे. दारुच्या नशेमध्ये असताना अपघात झाल्याचा आरोप त्यांचा मुलगा आकाश याच्यावर आहे. या प्रकरणी खासदार रुपा गांगुली यांनी निष्पक्ष चौकशी करण्याबाबत ट्विट केले आहे. ट्विटमध्ये त्यांनी पंतप्रधान नरेंद्र मोदींनाही टॅग केले आहे.

काल रात्री (गुरुवारी) आकाश याच्या गाडीला अपघात झाला होता. वळण घेत असताना गाडीवरील नियंत्रण सुटल्याने घराजवळील एका गोल्फ कल्बच्या भिंतीला गाडी धडकली होती. यामध्ये काही लोक थोडक्यात वाचल्याचे स्थानिकांनी सांगितले आहे. या अपघातामध्ये रुपा गांगुली यांचा मुलगा आकाश किरकोळ जखमी झाला आहे. अपघातानंतर भाजप खासदार रुपा गांगुली यांनी एक ट्विट केले आहे.

माझा मुलाच्या गाडीचा घराजवळच अपघात झाला आहे. मी पोलिसांना फोन केला असून तपास करण्यास सांगितले आहे. तपासामध्ये कोणतेही राजकारण किंवा पक्षपातीपणा होता कामा नये, असे खारदार गांगुली यांनी म्हटले आहे. मी माझ्या मुलावर प्रेम करते, मात्र त्याच्यावर कायद्यानुसारच कारवाई झाली पाहिजे, असे त्या म्हणाल्या. ट्विटमध्ये त्यांनी पंतप्रधान नरेंद्र मोदींनाही टॅग केले आहे. मी काही चुकीचे करत नाही आणि सहनही करत नाही. मी विकाऊ नाही, असे त्यांनी म्हटले आहे.

जादवपूर पोलिसांनी या प्रकरणी तपास सुरू केला आहे. आकाश गाडी चालवताना दारुच्या नशेत होता किंवा नाही याबबात वैद्यकीय तपासणी केली जाणार आहे. गाडीचा वेग किती होता यासह इतर बाबींचा तपास पोलीस करत आहेत.