कुणाल कामराची 'इंडिगो'ला नोटीस, मागितली 25 लाखांची नुकसानभरपाई

कुणाल कामराने इंडिगो विमान कंपनीला कायदेशीर नोटीस पाठवले आहे.

नवी दिल्ली -स्टँडअप कॉमेडिअन कुणाल कामरावर चार विमान कंपन्यांकडून प्रवासबंदी घालण्यात आली आहे. विमान कंपनी इंडिगोनं त्याच्यावर सहा महिन्यांची तर एअर इंडियानं त्याच्या विमान प्रवासावर अनिश्चित काळासाठी बंदी घातली आहे. त्यावर आज कुणाल कामराने इंडिगो विमान कंपनीला कायदेशीर नोटीस पाठवली आहे.

कुणाल कामराने इंडिगो विमान कंपनीला कायदेशीर नोटीस पाठवून त्याच्यावर लावलेली सहा महिन्यांची प्रवास बंदी हटवण्याची मागणी केली. विनाशर्त माफी आणि 25 लाख रुपये नुकसान भरपाई मागितली आहे. दरम्यान या नोटीसवर अद्याप इंडिगो विमान कंपनीकडून कोणतेच उत्तर आले नाही.

काय आहे प्रकरण?

रिपब्लिक टीव्ही या वृत्तवाहिनीचे संपादक अर्णब गोस्वामी हे इंडिगो विमानाने प्रवास करत असताना, कुणाल कामराने त्यांच्यासोबत जबरदस्ती बोलण्याचा प्रयत्न केला होता. या सर्व प्रकाराचा व्हिडिओ बनवत, कामराने त्यांना काही प्रश्नही विचारले होते. या प्रश्नांची उत्तरे अर्णब यांनी दिली नाहीत, त्यानंतर कामराने त्यांना "भित्रा पत्रकार" म्हटले होते. या सर्व प्रकाराचा व्हिडिओ त्याने ट्विटरवर अपलोड केला होता. विमान कंपन्यांनी यावर आक्षेप घेत कुणाल कामरावर प्रवास बंदी घातली आहे.