गोपालपोरा - जम्मू-काश्मीरमधील कुलगाममध्ये दहशतवादी आणि सुरक्षा दलांमध्ये बुधवारी रात्री उशिरा चकमक सुरू झाली. २ दहशतवाद्यांना यमसदनी धाडण्यात यश आले आहे.
याआधी १६ मे रोजी चकमक झाली होती. यामध्ये पुलवामाच्या दलिपोरा भागात ३ दहशतवाद्यांचा खात्मा करण्यात यश आले होते. या चकमकीदरम्यान सुरक्षा दलाच्या एका जवानालाही वीरमरण आले होते.
पुलवामा येथील दलिपोरा भागात काही दहशतवादी लपून बसल्याची माहिती एसओजीच्या संयुक्त टीमला मिळाली होती. जवानांनी या भागाला घेरले होते. यानंतर या भागात शोध मोहीम सुरू करण्यात आली. शोधमोहीम सुरू असतानाच दहशतवाद्यांनी गोळीबार सुरू केला. सुरक्षा दलाच्या जवानांनीही याला चोख प्रत्युत्तर देताना ३ दहशतवाद्यांना कंठस्नान घातले होते.
त्याआधी रविवारी (१२ मे) काश्मीरमधील शोपियांमध्ये सुरक्षा दल आणि दहशतवाद्यांमध्ये चकमक झाली होती. त्यावेळी ३ दहशतवादी ठार झाले होते. हे दोन्ही दहशतवादी लश्कर-ए-तोयबा या दहशतवादी संघटनेचे होते.