लष्कर दिन: सरसेनाध्यक्षांसह तिन्ही सेनादल प्रमुखांनी युद्ध स्मारकाला वाहिली आदरांजली

दिल्लीत भारताचे सरसेनाध्यक्ष बिपीन रावत, लष्कर प्रमुख मनोज मुकुंद नरवणे, हवाई दल प्रमुख आर. के. एस भदौरिया, नौदल प्रमुख करमबीर सिंग यांनी राष्ट्रीय युद्ध स्मारकाला आदरांजली वाहीली.

नवी दिल्ली - आजचा दिवस भारतीय लष्करासाठी महत्त्वाचा आहे. १५ जानेवारी हा दिवस संपूर्ण भारतामध्ये लष्कर दिन म्हणून साजरा करण्यात येतो. त्या निमित्ताने दिल्लीत भारताचे सरसेनाध्यक्ष बिपीन रावत, लष्कर प्रमुख मनोज मुकुंद नरवणे, हवाई दल प्रमुख आर. के. एस भदौरिया, नौदल प्रमुख करमबीर सिंग यांनी राष्ट्रीय युद्ध स्मारकाला आदरांजली वाहिली.

दिल्लीतील आर्मी परेड ग्राऊंड येथे आयोजित कार्यक्रमात लष्कर प्रमुख नरवणे यांनी जवानांना पदक देऊन गौरव केला. यावेळी सरसेनाध्यक्षांना मानवंदना देण्यात आली.

१५ जानेवारीला का साजरा केला जातो लष्कर दिन?या दिवशी भारतीय लष्कराच्या प्रमुखपदी भारतीय अधिकारी जनरल के. एम करीअप्पा यांची नियुक्ती झाली होती. १९४९ साली के. एम करिअप्पा यांची लष्कराच्या प्रमुखपदी नियुक्ती करण्यात आली होती. भारत स्वतंत्र झाल्यानंतर पहिले दोन लष्कर प्रमुख ब्रिटीश होते. सर फ्रान्सीस राबर्ट बुचर हे शेवटचे ब्रिटीश सेनाध्यक्ष होते. त्यांच्यानंतर हे पद भारतीय अधिकाऱ्याकडे आले. पहिले भारतीय सेनाध्यक्ष के. एम करिअप्पा यांना 'किपर' नावानेही ओळखळे जात असे. सेनाध्यक्षपदाचा कार्यभार स्वीकारला तेव्हा ते ४९ वर्षांचे होते. त्यांनी चार वर्ष सेनाध्यक्षपदाची धुरा सांभाळल्यानंतर १६ जानेवारी १९५३ ला ते निवृत्त झाले.