लखनौ -लग्नसमारंभावरून परतणाऱ्या गाडीला अपघात झाल्याने, एकाच कुटुंबातील सहा लोकांचा मृत्यू झाला, तर चार लोक गंभीर जखमी झाले. मृतांमध्ये तीन लहान मुलांचा समावेश असल्याची माहिती आहे. उत्तर प्रदेशच्या पीलीभीत जिल्ह्यातील गजरौला पोलीस ठाण्याच्या हद्दीत काल (गुरुवार) रात्री उशीरा हा अपघात झाला.
मिळालेल्या माहितीनुसार, हे कुटुंबीय लग्नसमारंभ आटोपून आपल्या घरी चालले होते. रात्री उशीरा खराब हवामानामुळे जोरदार पाऊस सुरू होता. त्यामुळे समोरचे काही दिसत नसल्यामुळे, त्यांची गाडी भरधाव वेगात झाडाला धडकली. या अपघातात कुटुंबातील पाच लोकांचा जागीच मृत्यू झाला, तर पाच जखमी झाले. जखमींना तातडीने जवळच्या जिल्हा रुग्णालयात दाखल करण्यात आले, त्यानंतर अधिक उपचारासाठी त्यांना तेथून बरेलीला हलवण्यात आले. यानंतर, जखमींपैकी एकाचा उपचारादरम्यान मृत्यू झाला.