मोदींचे आशीर्वाद घेवून नितीश कुमार लालूंच्या चरणी न जावो, चिराग पासवानांचा खोचक टोला

लोकजन शक्ती पक्षाचे अध्यक्ष चिराग पासवान यांनी मुख्यमंत्री नितीश कुमारांवर टीका केली आहे. यावेळी पंतप्रधान मोदींचे आशीर्वाद घेवून साहेब (नितीश कुमार) लालू प्रसाद यादव यांच्या चरणी न जावो, असा खोचक टोला चिराग पासवान यांनी मुख्यमंत्र्यांना लगावला.

पाटणा - बिहार विधानसभा निवडणूक जवळ येत असून राजकीय नेते तुफान फटकेबाजी करत आहेत. एनडीए आणि महागठबंधनने नागरिकांना निवडणूक जाहीरनाम्यातून विविध प्रलोभने दाखविली आहेत. दरम्यान, लोक जनशक्ती पक्षाचे अध्यक्ष चिराग पासवान यांनी मुख्यमंत्री नितीश कुमारांवर टीका केली आहे. या निवडणुकीत पंतप्रधान मोदींचे आशीर्वाद घेवून साहेब (नितीश कुमार) लालू प्रसाद यादव यांच्या चरणी न जावो, असा खोचक टोला चिराग पासवान यांनी मुख्यमंत्र्यांना लगावला.

चिराग पासवान यांनी ट्विट करून मुख्यमंत्री नितीश कुमारांना लक्ष्य केले. मागील बिहार विधानसभा निवडणुकीत आरजेडी आणि जेडीयू एकत्र लढले. मात्र, त्यानंतर नितीश कुमारांनी आघाडीतून बाहेर पडत भाजपाचा पाठिंबा घेतला. त्यावरून चिराग पासवान यांनी टीका केली. 'मागील निवडणुकीत लालू प्रसाद यादव यांच्या आशीर्वादाने नितीश कुमार मुख्यमंत्री बनले आणि त्यांना धोका देऊन पंतप्रधानांच्या आशीर्वादाने रात्रीत पुन्हा मुख्यमंत्री बनले. यावेळी मोदींचे आशीर्वाद घेऊन ते लालू प्रसाद यादव यांच्या चरणी न जावो, असे ट्विट चिराग पासवान यांनी केले आहे.

नितीश कुमार यांनी षड्यंत्र करून भाजपाला कमी जागा दिल्या. या निवडणुकीत नितीश कुमारांना १२१ जागा पाहिजे होत्या. मात्र, लालू प्रसाद यादव यांच्या सोबत मागची निवडणूक लढताना ते १०१ जागांवर राजी झाले होते. नितीश कुमारांनी आधी बिहारला फसवले नंतर भाजपाला, असेही चिराग यांनी ट्विटमध्ये म्हटले आहे.

नितीश कुमार यांच्याकडे बिहारच्या विकासासाठी कोणतीही योजना नाही. त्यामुळे मी त्यांना पुन्हा मुख्यमंत्री होताना पाहू शकत नाही, असे पासवान यांनी याआधी म्हटले होते.

२४३ सदस्यांच्या बिहार विधानसभेसाठी तीन टप्प्यात निवडणूक होत आहे. २८ ऑक्टोबर, ३ नोव्हेंबर आणि ७ नोव्हेंबर रोजी मतदान होईल, तर मतमोजणी १० नोव्हेंबरला होईल. पहिल्या टप्प्यात २८ नोव्हेंबरला ७१ विधानसभा जागांसाठी मतदान होईल, तर दुसऱ्या टप्प्यात ३ नोव्हेंबरला ९४ जागांसाठी आणि शेवटच्या टप्प्यात ७ नोव्हेंबरला ७८ जागांसाठी मतदान होणार आहे. या निवडणुकीत, राजद काँग्रेस आणि डाव्या पक्षांच्या साथीने लढत असून भाजपा आणि जेडीयूसह इतर चार पक्ष त्यांच्या विरोधात निवडणूक रिंगणात उतरले आहेत.